Khawzawl, the 23^rd August, 2021:

Vawiin chawhnu dar 1:00 khan Pu C.C. Lalchhuangkima, Deputy Commissioner, Khawzawl District chuan Khawzawl District huam chhunga National Highway No. 6 kawng laih hna thawktu NHIDCL contractor te  chu an hna thawh tawh chin leh harsatna an neihte sawipuiin meeting a neihpui.

Khawzawl District Bawrhsap Pu C.C. Lalchhuangkima chuan NHIDCL contractor te chu thawhpuiah sawmin, National Highway No. 6 chu Khawzawl District leh Mizoram tan kawngpui pawimawh tak a nih avangin hna tha leh chhenfakawm hnutchhiah tur leh, a hun tak a zo thei tura hma la turin a chah a. Puih an ngaihna-a pui turin District Administration chu a inpeih reng tih a sawi a ni. 

Khawzawl DC chuan kawng laih vanga leivung tamtak awm thinin a bulhnaia lo leh huan neite tan harsatna a siam thei tih sawiin, leivung chu a paihna hmun tur mumal taka ruat a, chung hmunahte chauh chuan paihfai thin turin Contractor te chu a hriattir a. Corporate Social Responsibility kaltlanga an luanchhuah tawhnaah lawmthu sawiin, mipui leh khawtlang tana thiltha leh tangkai hnutchhiah tura luangchhuak zui zel turin a sawm zui a ni. Deputy Chief Minister, bialtu MLA ni bawk Pu Tawnluia duh angin CSR kaltlanga Khawzawl District Hospital-a Blood Storage Centre din theih dan tur ngaihtuah ho a ni bawk.

Khawzawl District chhungah NH-6 kawng laih hna hi package pali-ah then niin, hei hi contractor paliin an thawk mek a. Seling-Dulte Package IV, km 17.160 a thui chu Anusha Projects Pvt. Ltd. in thawkin, tunah hian hna 41.69% zawh tawh a ni a, contract agreement-a inziak aia hunbi hma zelah an hnathawh a kal mek a ni. Dulte to Champhai (Package – I), km 17.950 a thui laih hna chu Dhariwal Buildtech Limited in kumin June thla tawp atangin an thawk tan a, nakum December ni 24 a zawh hman tura ruahman niin, tunah hian hna zawng zawng atanga chhut a 5.17% an thawk zo tawh a ni. 

Heng bakah hian Dulte to Champhai (Package -II), km 12.450 a sei chu M/S Dwarkamai Construction Pvt. Ltd. in an thawk tan tawh a. Dulte to Champhai (Package – III), km 26.780 a sei chu Shri Balaji Construction Company in June ni 25 atanga thawk tanin, tunah hian 1.84% thawh zawh tawh a ni bawk. 

Contractor te chu an hnuaia hna thawk, Inner Line Permit mamawhte chu a rang thei anga dilsak vek turin chah an ni a. Contractor te pawhin an hnathawh mekah harsatna lian tham an tawk rih lo tih an sawi ve bawk a ni. 

Vawiina NHIDCL contractor te nena meeting ah hian Pu Lalrohlua, Additional Deputy Commissioner leh Competent Authority for Land Acquisition (CALA), DC office-a officer dang te leh NHIDCL contractor aiawhte an tel a ni. 

Written by H. Lalramenga, SDC, Khawzawl District