Khawzawl, the 9^th July, 2021:

Vawiin chawhma dar 10:00 khan Pu Tawnluia, Deputy Chief Minister leh MLA, Tuichang Assembly Constituency in a bial chhunga AAY chhungkaw 668 leh PHH member 13,535 te July thla ration a khulsakna pawisa Rs. 2,73,165/- (Cheng nuaihnih, sing sarih, sangthum za leh sawmruk panga) chu Pu Zothanmawia, Deputy Commissioner, Khawzawl District in MNF Tuichang Block hruaitute kutah a hlan a, pawisa hi veng/khua hrang hranga Retailer te hnenah hlan chhawn a ni. 

Deputy CM in a bial chhunga chhungkaw harsate ration a khulsak na pawisa hlanna pual hian DC Conference Hall, Khawzawl Darngawn-ah hun hman a ni. 

Khawzawl District Bawrhsap Pu Zothanmawia chuan he hunah hian thu sawiin, a bial chhung mi harsate ngaihtuah thintu bialtu MLA chungah lawmthu a sawi a. Covid-19 hrileng vanga chhungkaw tamtakin harsatna an tawh mek lai, chhawmdawl an mamawh lai taka tanpuina an dawng tur chu a lawmawm hle a ni a ti.  

DC Conference Hall-a hun hmanah hian Pu C Kera, President, MNF Tuichang pawhin thu sawiin, mi harsa zawkte dinhmun ngaihtuah chung a a mimal sum senga Deputy CM in chhawmdawlna a ngaihtuah thin chu lawmawm a tih thu a tarlang a. A hmuna theihtawpa lo buaipui thintu Deputy Commissioner leh a thawhpuite chungah lawmthu a sawi bawk.

Pu James Lalnithanga, SDO(S) kaihhruaia vawiina hun hmanah hian DC office-a officer te bakah Tuichang MNF North leh South Block hruaitute an tel a ni. 

Pu Tawnluia, Deputy Chief Minister in July thla ration buhfai a khulsak zat hi AAY chhungkaw 668 tan quintal 233.8 leh PHH member 13,535 te tan quintal 676.75 niin, ration khulna man hi Rs. 2,73,165/- (Cheng nuaihnih, sing sarih, sangthum za leh sawmruk panga) a ni a. AAY chhungkaw pakhatin buhfai kg 35 zel dawngin, PHH member tinin buhfai kg. 5 zel an dawng bawk.

Written by H. Lalramenga, SDC, Khawzawl District