Khawzawl, the 12th June, 2021:
Vawiin chawhma dar 10:00 khan Pu Tawnluia, Deputy Chief Minister leh MLA, Tuichang Assembly Constituency in a bial chhunga AAY leh PHH chhungkaw 3,466 te June thla ration a khulsakna pawisa Rs. 2,72,475/- (Cheng nuaihnih, sing sarih, sanghnih zali leh sawmsarih panga) chu Pu Zothanmawia, Deputy Commissioner, Khawzawl District in MNF Block hruaitute kutah a hlan a, pawisa hi vawiinah vek khan veng/khua hrang hranga Retailer te hnenah hlan chhawn nghal a ni.
Deputy CM in a bial chhunga chhungkaw harsate ration a khulsak na pawisa hlanna pual hian DC Conference Hall, Khawzawl Darngawn-ah hun hman a ni.
Pu Zothanmawia, Deputy Commissioner chuan he hunah hian thu sawiin, Deputy CM chu a bial mipuite tan a inhawngin, a ngaihven reng thin tih a sawi a. Covid-19 vangin Khawzawl District-ah Lockdown kalpui mek a ni a, Lockdown vangin eichawp zawng leh inhlawhfa thin tan eizawn a buaithlakin sum leng vak a tlem phah hle a ni tih tarlangin, hun harsa tak kan tawh mek laia bialtu MLA in kawng hrang hranga tanpuina a rawn pe thin chu a lawmawm hle a ni tih a sawi.
Pu Lalnunpuia, Chairman, Khawzawl District Village Council Association pawhin thu sawiin, Deputy CM zahawm tak chuan Covid-19 first wave lai atanga a bial mipuite tan theihtawp a chhuah thin tih a tarlang a. Tunhnaia VLTF leh damdawiin a hman tur tanpuina a pek zawh hnu lawkah, chhungkaw harsa zawkte ration buhfai a khulsak leh ta chu lawmawm a tih thu sawiin, Khawzawl District tana theihtawp chhuaha thawktu DC leh a thawhpuite chungah lawmthu a sawi bawk a ni.
Vawiina DC Conference Hall-a hun hmanah hian Pu H. Lalrozama, President, MNF Tuichang South Block chuan Covid-19 hrileng vanga buaina karah pawh Pathianin Khawzawl District a hruainaah lawmthu sawi thin a pawimawh a ni a ti a. Khawzawl District chu District naupang te la ni mah se bialtu MLA tha tak, a bial mite ngaihtuah tak bakah DC leh a thawhpui fel leh Khawzawl District hma ngai tak tak an awm chu lawmawm a tih thu a sawi.
Pu H Thuamliana, FCS&CA staff chuan sawrkar laipuiin AAY leh PHH chhungkuate tana a thlawna buhfai a sem chungchangah hriatthiam loh leh hriat dik tawk loh awm theite tarlangin a sawifiah a. Covid-19 vangin Central Sawrkar chuan ration pangngai bakah AAY leh PHH chhungkaw member pakhat tan kg. 5 zel a thlawnin a pek belh a. Hei hi ration pangngai, AAY chhungkaw pakhatah kg 35 leh PHH chhungkaw member tinah kg 5 nen hriatpawlh loh tur a ni a ti a. Tuna Deputy CM in a khulsak hi chu Central sawrkarin a thlawna a pekbelh ni lo, ration pangngai zawk a ni tih tarlangin, a dawngtute tan chuan a hlu hle a ni a ti.
Pu Tawnluia, Deputy CM in June thla ration buhfai a khulsak zat hi AAY chhungkaw 676 tan quintal 236.6 leh PHH chhungkaw 2790 tan quintal 671.65 niin, ration Khulna man hi Rs. 272,475/- (Cheng nuaihnih, sing sarih, sanghnih zali leh sawmsarih panga) a ni.
Written by H. Lalramenga, SDC, Khawzawl District
