Khawzawl, the 24^th May, 2021

Deputy Chief Minister, Tuichang Assembly Constituency bialtu MLA ni bawk Pu Tawnluia hmalaknain District Hospital, Khawzawl-a thawktu indaih lohna phuhruk nan Lab Technician pathum te chuan vawiin atangin hna an thawk tan. 

Kar hmasa Zirtawpni khan Khawzawl District Covid-19 Medical team zinga mi pahnihte chu Covid-19 positive an ni tih hmuhchhuah a ni a. Damdawiin-a thawk mi engemawzat chu Primary/Secondary contact zingah telin khunghran mek an ni. Hrileng karah Bialtu MLA chuan hma la nghalin, Khawzawl District Bawrhsap Pu Zothanmawia hovin Hospital-a staff dinhmun leh thawktu mamawh belh dan te zirchian a ni a. Covid-19 hrileng mek karah RAgT hmanga test kalpui chu thil pawimawh hmasa-a ngaih niin, hemi atan hian Deputy CM chuan ama sum sengin Lab Technician Pi Margaret B Lalmuanawmi d/o B Laltlanmawia, Khawzawl Kawnzar chu a ruai nghal a ni. 

Hemi bakah hian Covid-19 Team, Champhai District atangin Lab Technician pakhat hawh lailawk a ni a. Tin, Champhai CMO office kaltlangin Pi F.Lalchawithangi, Khawzawl Hermon chu rawih a ni bawk. Heng Lab Technician pathumte hi inkhunghran vanga Khawzawl District-a thawktute indaih loh chhung chu an thawk dawn a ni.

Covid-19 hrilenga frontline worker te harsatna tawh hrethiam a, mamawh phuhru tura chak taka hma latu Deputy Chief Minister chungah District Hospital a thawktute leh bial mipuite an lawm hle a ni.