Khawzawl, the 26^th May, 2021

Deputy Chief Minister, Tuichang Assembly Constituency bialtu MLA ni bawk Pu Tawnluia chuan a bial chhunga Damdawiin pathum leh Village Level Task Force sawmhnihpali (24) te hnenah Covid-19 hrileng dona hmanrua engemawzat a pe a, heng hmanruate hi vawiinah Khawzawlah phurh thlen niin, vawiin vek khan semchhuah nghal a ni.  

Pu Tawnluia, Deputy Chief Minister in Covid-19 dona hmanrua a pekte lo dawnsawnna leh semchhuahna programme hi vawiin chhun dar 12:00 ah Deputy Commissioner’s office tualah hman a ni a. He hunah hian Pu Zothanmawia, Deputy Commissioner, Khawzawl District chuan thu sawiin, Covid-19 hrileng dona atana mamawh tak mai, a hun taka dawn a ni thin chu lawmawm a ti a, Khawzawl District mipuite ngaihtuah em emtu bialtu MLA chungah lawmthu a sawi a ni. 

Pu Zothanmawia chuan sawi chhunzawmin, Covid-19 dona hmanruate chu Hospital leh VLTF te kutah a awm mai mai dawn lo a, tangkai taka hman tura Deputy CM in a rawn pek a ni a ti a. Mipui nawlpuiin Covid-19 vanga inkhuahkhirhna dan te an zawm tha chu lawmawm a tih thu a sawi bawk. Covid-19 hrilengin a hma aiin Khawzawl District pawh a hnaih lehzual tawh a, chuvangin mahni in a tawm tam a, thuawih zel a tul a ni a ti. VLTF te chu an veng/khaw chhunga chhuanchham leh harsa bik an awm a nih phawt chuan report vat thin turin a chah bawk. Hemi hnu hian Hospital pathum leh VLTF aiawhte hnenah bungruate hi a hlan chhunzawm nghal a ni.

Pu C. Kera, MNF Tuichang North Block President pawhin thu sawiin, Deputy Chief Minister chuan Covid-19 natna vanga taksa harsatna a tawh lai pawhin a bialchhung mipuite a ngaihtuah em em reng a, a bial chhungah chhuanchham an awm loh nan leh, VLTF te tha tichak turin tunhnaiah buhfai leh pawisa fai a sem tawh tih a sawi a. Damdawiin leh VLTF te tana tangkai tak tur bungrua engemawzat a pe leh ta chu a lawmawmin, hrileng dona atana theihtawp chhuahtu Deputy CM chungah lawmthu a sawi a ni. 

Vawiina programme hi Pu Lalrohlua, Additional Deputy Commissioner chuan a kaihruai a. Pu H Lalramenga, SDC in bungraw dawn zat report a pe bawk. 

Deputy CM in hrileng dona hmanrua a pek zingah hian Tuichang Assembly Constituency huamchhunga Damdawiin pathum – District Hospital, Khawzawl, Khawhai PHC leh Sialhawk PHC – a hman turin PPE Full Set 110, Facemask 900, Hand Sanitizer bottle 20, Face Shield 90, Glove box 40 bakah Pulse Oxymeter 20, Thermometer Digital 20, Steamer 30, Bleaching powder bag 4 leh Sodium Hypochlorite solution gallon 14 a tel a. VLTF sawmhnihpali te hnenah Facemask engemawzat leh Hand Sanitizer litre 5 theuh pek a ni bawk. Heng bungrua te hi MNF Tuichang North Block leh Tuichang South Block hruaituten VLTF te hnenah an semchhuak ve leh dawn a ni. 

Vawiin programme-ah hian DC office a officer leh staff te, MNF Tuichang North leh South Block hruaitute, Tuichang AC chhunga damdawiin pathum aiawhte leh Khawzawl khawchhunga VLTF aiawh te an tel a ni. 

Written by H. Lalramenga, SDC, Khawzawl District