Khawzawl, the 14th May, 2021:
Vawiin khan Pu Tawnluia, Deputy Chief Minister zahawm tak chuan a bial Tuichang Assembly Constituency chhunga Total Lockdown vanga hna thawk thei lo, chhuanchham dinhmuna ding mai thei chhungkaw 489 hnenah buhfai a pe a, buhfai hi vawiinah semchhuah nghal a ni.
Tuichang Assembly Constituency huamchhunga a mamawhte hnena buhfai semna hi Pu Zothanmawia, Deputy Commissioner in a kaihruai a. Covid-19 hrileng laka himna tura sawrkar SOP duante zawm chungin DC office staff, veng/khaw hrang hranga VLTF te leh Block MNF hruaitu te nen tangruala sem a ni.
Vawiina buhfai semna-ah hian buhfai quintal 50 leh kg 80 sem a ni a. Hengte hi DC office ah phurhkhawm niin, pik up pathum leh LPK pakhat hmangin Khawzawl khawpui chhung leh Tuichang Assembly Constituency khaw hrang hrangah te sem a ni. Buhfai dawngtute hi Khawzawlah chhungkaw 264 leh khaw dang sawmpahnihah chhungkaw 225 an awm a ni.
Written by H. Lalramenga, SDC, Khawzawl District
