Deputy Govt. Chief Whip, Tuichang A/C bialtu MLA ni bawk Pu W. Chhuanawma chuan Ni 10.09.2024 khan Khawzawl District Hospital leh District Education Office a tlawh a, a hmunhma te fangin thawktute nen inkawmna hun an hmang.

Khawzawl District Hospital-ah hian Pu W. Chhuanawma hi Chief Medical Officer (CMO) mawhphurhna la mektu, Dr. Albert Lalhminghlua leh a thawhpui ten lo dawngsawngin, damdawiin hi an fang a, building sak lai mek an enfiah bawk. Meeting hall-ah inkawmna hun hman a ni a, he hunah hian District Hospital leh CMO Office mamawh hrang hrang te an thlen a ni.

District Hospital-a hun a hman zawh hian Pu W. Chhuanawma hian District Education Office (DEO) tlawhin, DEO a thawktute nen inkawmna hun an hmang a. An thil mamawh hrang hrang te MLA hnenah hian lo thlenin, hmalak dan tur te an sawiho a ni. MLA Pu W. Chhuanawma chuan DEO leh District Hospital thawktute chu an mamawh apiangte a hnenah thlen zel turin a hrilh a, amah ngei an be thei lo a nih pawhin district hotute leh hruaitute kaltlangin thlen zel theih a ni tih a sawi bawk. District hmasawn zel theih nan ngaihtuahna an seng reng a ni tih hriatpui turin MLA hian a chah bawk a ni.

MLA Pu W. Chhuanawma hi Khawzawl Deputy Commissioner Pu K. Vanlalthiana, Addl. Deputy Commissioner Pu Lalfakzuala leh DIPRO Pu Lalzara ten an tawiawm a ni.