Khawzawl 2nd, August 2023: Vawiin chawhnu khan Deputy Chief Minister, Tuichang AC bialtu ni bawk Pu Tawnluia chuan Khawzawl Zuchhip Venga cheng vaibelchhe 4.41 senga sak tur Multi-purpose Community Hall sakna tur lungphum a phum.
Lungphum phumna puala inkhawm tawi Khawzawl BNRGSK Hall-a neihah Deputy Chief Minister Pu Tawnluia chuan thu sawiin Multi-purpose Community Hall sakna tur lungphum phum a ni ta chu lawmawm a tih thu leh hei hi khawtlangin kawng hrang hranga an hman tangkai tur a ni, a ti a. Ram leh hnam a than zel nan khawtlang, vangtlang tana tangkai thil te sawrkarin a ngai pawimawh tih sawiin Multi-purpose Community Hall pawh hi mipui vantlang tana tangkai tur a ni, a ti a. District hmunpui Khawzawlin a neih chuan ken tel tam tak a neih thu sawiin Deputy CM chuan vawiina lungphum phum tak Multi-Purpose Community Hall pawh chu District-in a ken tel pawimawh tak a ni, a ti. Hall sak hi duhin an ngaihtuahnaah awm thin mahse sum harsatna vangin duh ang hma lak chak a har hle a ni, a ti a. Project estimate leh DPR te an an siam hnuah Chief Minister-in SASCE atangin Hall sakna tur a pek thu tarlangin, CM chungah lawm thu a sawi a. Hall sa tur hian Tender engkim mai dan ang taka kalpui a nih thu leh a bultan chhoh theih a ni tur chu lawmawm a tih thu a sawi bawk.
Pu Tawnluia chuan neitu thinlung put a tul tih sawiin Community Hall sak tur pawh hi vantlang ta a nih angin kan dimdawi loha, midangte enkawl tur leh midangte mawhphurhnaa a kan dah a nih chuan a hlawhchham dawn a ni, a ti a. Hall hi a neitu kan ni tih a tir atangin kan rilruah awm se, a neitu thinlung pu chuan sa ila, enkawl ila, uluk ila, chu chuan Hall hi a ti thianghlim ang a, a ti tlo ang a, a ti mawihnai ang a, a ti nuam dawn bawk a ni, a ti.
Vawiin hun hman hi Pu Malsawmzuala, Joint Director, UD & PA Department in kaihruaiin Er. C. Malsawma, E.E., UD & PA Department in Technical Report a pe a. Khawzawl Sub-Hqrs. YMA President Pu PC. Rosiama, District Village Council President Pu Lalnunpuia leh District Bawrhsap Pu K. Lalrohlua te pawhin thu an sawi a, Pu Lalthakima, Chhangte, DUDO, Khawzawl in lawmthu sawiin hun a khar a ni.
Multi-purpose Community Hall hi chhawng thuma sanga sak tur niin, M/s Zothan Consultancy Services, Luangmual, Aizawl in an sa dawn a ni. Ground Floor-ah Dawr siamna tur kaw 7 leh Inthiarna 2 a awm ang a, First Floor-ah Parking, Table Tennis Hall, Committee Room, Library, Recreation Room, Office, Kitchen, Store Room, Toilet awmin, Second leh Third Floor-ah Hall, Green Room, Toilet 2 leh Store Room te a awm dawn a ni.
