September ni 8, 2023 khan Deputy Chief Minister, Tuichang AC bialtu ni bawk Pu Tawnluia chuan Khawzawl Arro Venga District Research Office building thar chu a hawng.
Hawnna puala inkhawm tawi District Research Office-a neihah hian khuallian Pu Tawnluia chuan vawiina hawn tak District Research Office chu Mizoram sawrkara Department pawimawh tak Planning & Programme Implementation hnuaia awm a nih thu sawiin, department pawimawh tak, district-in a ken tel a ni, a ti a. District Research Office chu hna ropui tak thawktu, hmathlir thui tak sawrkarin a neih theihna hnar pawimawh tak a ni, a ti bawk.
Mizoram sawrkarin mipuite hmasawnna ngaipawimawh mah se hripui leng vangin harsatna tam tak an tawk a,sawrkar laipui atanga sum hmuh tur cheng vaibelchhe 3000 dawn a hmu lo a ni, Deputy CM chuan a ti a. Mipui ten anmahni kutkawih ngeia intodelhna kawng an zawh theihna tur sawrkar flagship program - ‘SEDP’ pawh hripui lengin tikhaihlak mah se, 1st phase-ah mi 60,000 tuam tawh niin, 2nd phase-ah mi 60,000 bawk tuam tum a ni a; September thla chhung hian sem chhuah hman tum a ni tih a tarlang. Mizoram sawrkarin mitin huapzo hmasawnna kalpuia, retheite khaichhuah chu a ngaipawimawh hle a ni tiin hripui leng kara sawrkar hmalakna ten rah tha a chhuah chho mek tih hriat chu lawmawm a tih thu a sawi bawk.
Pu Tawnluia hian DRO hmunhma tur inhawng taka ngaihtuahtu Khawzawl Arro khawtlang te chungah lawmthu a sawi a. Khawzawl mipuite chu inpumkhatna leh tangrual taka Office hawn thar chu enkawl turin a chah a, khua leh District hmasawnna thlentu ni ngei turin duhsakna a hlan a ni.
He huna thusawitu dang Additional DC Pu Lalfakzuala chuan Khawzawl District-in hmasawnna hmel thar a hmu chho zel chu lawmawm a tih thu a sawi a. Mipui ten office hrang hrang hnathawh an hriat zau zel a pawimawh thu pawh sawiin, Khawzawl District-a office-te chu awlsam zawka mipui ten an dawr theih nan website, citizen charter leh RTI Online te ngaipawimawh theuh turin a ngen nghal a. District Research Office chuan District hmasawnna pui turin data rintlak chhawpchhuahsak ngei se a duh thu a sawi bawk a ni.
He hunah hian PWD Sr. Executive Engineer Er Lalremruata chuan technical report a pe a.
Khawzawl District Research Office hi September ni 12, 2022 khan sak tan a ni a,May ni 12, 2023 khan sak zawh a ni. Building hi cheng nuai 43 senga sak niin, chhawng hniha sang, square meter 227.43 a zau a ni a.Ground floor-ah hian - Staff Room, Video Conferencing Room, DRO Room, Toilet te a awm a; first floor-ah hian DRO Quarter awmin choka, living room leh bedroom pahnih a awm a ni.
Inkhawm hi Economics & Statistics Director Pu B. Lalrinhlua chuan kaihruaiin, inlawmna thu a sawi a. District Treasury Officer Pu C.Lalngura, Khawzawl Joint VC Chairman Pu Vanlalsiama te pawhin thu an sawi bawk. Deputy Director Pi Mary Lalrinchhungi chuan lawmthu sawina a hman zawhah inkhawm hi tihtawp a ni.
