Khawzawl, the 5th February, 2021

Vawiin khan Mizoram sawrkara Deputy Chief Minister Pu Tawnluia, Tuichang Assembly Constituency bialtu ni bawk chuan Khawzawl Electric Vengah DAO Khawzawl Pisa thar leh Khawzawl District-a kalpui tan tur FOCUS Project-te a hawng. Hemi hnu hian hawnna puala inkhawm  Zaingen Veng YMA Hall-a buatsaih chu Khuallian niin a hmanpuia,  Agriculture Minister Pu C.Lalrinsanga chu Khualzahawm a ni.

Khuallian  Pu Tawnluia chuan District naupangte Khawzawla DAO Office leh FOCUS Project hawn thar ani chu lawmawm tiin, thahnemngai taka thawktute a fak a. International funding project duhawm tak Mizoramin a nei thei chu vanneihthlak a tih thu leh a taka kalpui anih theihna kawnga hmalatu Agriculture Minister leh thawktute chungah lawmthu a sawi a. IFAD kaltlanga FOCUS project tha tak chu Agriculture leh a kaihhnawih Department-te hmalakna kallaite mai bakah hmalakna thar duhawm tak takte thawhna tur anih avangin District-in a chhawr tangkai hle dawn a ni, a ti bawk.

Mipuite chu FOCUS project tha tak chu a dawnsawn dan thiam tur leh line department hrang hranga thawktute nena tangho thiam turin a chah a. Tihtakzeta rilru leh thinlung hawnga inpuahchah tura fuihin, kum reiloteah Khawzawl District-in hma a sawnpui theih ngei a beisei thu a sawi a. A thlawna thil sem chauh beisei lova a taka titu nih tuma insangmar tur leh mawhphurhna hlenchhuak turin a fuih bawk a. Sawrkar flagship program SEDP kaltlangin ram leilung hausakna hmang tangkaia ei leh bar, silh leh fena intodelh chu Mizoram sawrkar tum anih thu sawiin, Covid hripui dova Sawrkar a hmanhlel avangin kum dang angin hmalak chak a har a,  Pathian zarah Covid-19 boruak a reh ve zel avangin mumal zawka ke pen theih beisei ani, a ti bawk.

Deputy Chief Minister chuan Khawzawl District chhunga sawrkar hmalakna hrang hrang leh hmachhawpte tarlangin a tul ang zela hmalak tum anih thu a sawi a. Fai intihsiakna Town Category-a pathumna a hauh chu chhuanawm a tih thu sawiin, faina lama theihtawp chhuaha tanla zel turin a fuih a. DC kaihhruaina hnuaia  thawhhona tha tak awm chu fakin, Sawrkar hnathawkte chu District pianghlim, la naupang tak chu tithangliana tiphuisui tura tan la sauh sauh turin a chaha, mipui rawngbawltu an ni tih inhre thar leh tura chahin, mipuite pawh hmasawnna ruhrel neihte neitu nihna thinlung pu chunga enkawl thiam  turin a chah bawk a. FOCUS Project chu anihna tur ang taka hlawhtling taka kalpui anih theihna tura theihtawp chhuah turin line department thawktute leh mipuite a chah a ni.

Khualzahawm Agriculture Minister Pu C.Lalrinsanga chuan  Mizoram District thlan hmaksak 4 te belhchhah tura UNO in Khawzawl leh Saitual District-a FOCUS Project kalpui a remtih avangin District pahnihte a lawmpui thu a sawi a. Ei leh bar dehchhuah kawnga intodelh leh kuthnathawktute chawikan chu sawrkar thil tum lian ber anih thu sawiin, ei leh bar deuhchhuah kawnga intodelh ni turin Economic independent kan la sual mek zel a ni, a ti a. Mizoram mipuite chu ram leh hnam intodelh ni thei tura  Pathianin tha leh theihna min pekte hre reng tur leh  tihlawhtling tura theihtawp chhuahpuiah a sawm a ni.

Agriculture Minister chuan Chemical Fertilizer hmanga chawm thei leh thlai laka kan fihlim theihna tur leh hriselna lamtluang kan zawh theihna turin tualchhung thar ngei thlai leh thei hrisel kan thar tam deuh deuh angai a ni, a ti a. Sik leh sa danglamin ei leh bar dehchhuah kawngah nghawng nasa tak a neih thlir reng chungin FOCUS Project  hmanga hmalak anih thu pawh tarlangin, hlawhtlinpui anih theihna turin Loneitute leh Official-te thawkho thiam turin a chah a.  Ram dinchhuahna tura theihtawp chhuaha tanlatute fakin tha thlah lova chhunzawm zel turin a fuih a. Sawrkar laipui, State Sawrkar leh Loneitute tanhona kaltlanga neih theih nizung chakna  hmanga tui pump chhuahna khawl tha tak engemawzat  chahchhuah tum anih thu pawh sawiin, hei hian buh leh bal tharchhuah kawngah nasa takin min pui thei dawn a ni, a ti.

Pu C.Lalrinsanga chuan FOCUS funding leh a kaihhnawihte uluk taka vil zel niin UNO lamte rawn chung zela kalpui thin a ni, a ti a. Khawzawl District chhungah huam zau zawk Integrated Approach hmanga hmalak theihna a awm nual avangin hmasawnna tur tam tak leh theihna a awm thu sawiin, Official level atanga farmer thlengin hrui khat vuana mar taka kal tur chuan kan zavaia tanrual a ngai hle dawn a ni, a ti. KVK thutchilh district te'n hamthatna nasa tak an neih thu sawiin, KVK chhawr tangkai tum tura fuihin, thawktute pawh tanpui duhna thinlung pu tlat thin turin a chah a. Sawrkar hnathawkte chu tihtakzeta hna thawka mawhphurhna hlen tum tura chahin, Loneitute  hnimhnaitu ber Village Level Worker-te chu tanla zual turin a chah bawk a ni. 

He hun kaihruaitu  Pu Lalhmingthanga IAS, Co-Chairman, SCRAM, Commissioner & Secretary, Agriculture  Department chuan  DAO Khawzawl Office leh FOCUS Project hawn tak chu Khawzawl District leh Mizoram tana bungthar kaina pawimawh tak, Agriculture Department leh a kaihhnawih Department dange tana ni chhinchhiahtlak tak anih thu a sawi bawk.

Khawzawl DC Pu Zothanmawia, MCS, Chairman, DLCC, FOCUS Khawzawl District chuan kalkhawmte lawmna thu a sawi a. Pu R.K.Nithanga, State Project Director, FOCUS Mizoram chuan kalkhawmte inhmelhriattirna neiin Project chungchang sawizauna hun a hmang bawk a. Dr.H.Saithantluanga, Mission Director, FOCUS & Director of Agriculture chuan lawmthu sawiin hun a khar a ni.

Chawhnu lamah PMU, FOCUS buatsaih Start up Workshop FOCUS Staff, DAO's Staff leh VC te puala siam chu neih chhunzawm a ni a. FOCUS Project hnuaia thawk mithiam te'n training an pe a ni.

DAO Khawzawl District  & District Project Manager, FOCUS atan Pu Vanlalthlamuana, MAS chu dah a ni a. Khawzawl District-ah FOCUS Staff  17 an awm mek a, khaw 28 an enkawl dawn a ni. FOCUS Mizoram hnuaiah hian  thawktu mi 250 vel an awm mek a, Project hi  kum 6 atan niin, 2018 atanga 2024 thleng awh tur a ni a, cheng vaibelchhe 520 vel dawn senna tura ruahman a ni. A tira ruahman District 4 - Champhai, Kolasib, Serchhip leh Mamit-te belhchhah turin Saitual leh Khawzawl, a vaiin District 6 ah FOCUS Project hi kalpui a ni ta a ni. Khaw thar 29 awm belhin tun dinhmunah hian khaw 301 ah hmalakna kalpui mek a ni a. Khawtinah Lead farmer leh Village Animal Health Worker dah vek an ni a, thla tin lawmman Rs1000/- pek thin an ni. Farmer Interest Group 2766 din a ni tawh bawk a.

FOCUS Project hnuaiah hian Department pali - Agriculture, Horticulture, Animal Husbandry & Veterinary leh Soil & Water Conservation-te an tel a ni.

Fostering Climate Resilient Upland Farming Systems in the North East (FOCUS) hi United Nations peng pakhat International Fund for Agriculture Development sum atanga project ruahman niin Mizoram leh Nagaland-ah kalpui mek a ni a. Mizoram-ah chuan March 2019 atanga bul tan a ni. District thar 3 a khaw thenkhatte siksawi a nih tak avangin District dang 2 Saitual leh Khawzawlahte FOCUS hi huam tel tura hmalakna kal zelah vawiin khan Khawzawl District-a FOCUS bultanna tur chu hawn a lo ni ta a ni.

Deputy Chief Minister leh Agriculture Minister-te hi Agriculture Department Commissioner & Secretary Pu Lalhmingthanga, Director Dr. Saithantluanga leh a thawhpui dangte leh FOCUS hotu te'n an tawiawm a ni.