Khawzawl, the 4th March, 2023: Vawiin chawhnu  khan Deputy Chief Minister Pu Tawnluia, UD&PA Department changtu Minister chuan Khawzawl Darngawn ram, pengpui tlanga bawlhhlawh sakhat sawngbawlna tur, Solid Waste Management Centre sak mek chu a hmunah kalin a tlawh a, hna thawh tawh dan leh hmabak chhunzawm dan turte a enfiah a, hemi hnu hian Khualen khua a tlawh bawk. 


Deputy Chief Minister Pu Tawnluia chuan Khawzawla Solid Waste Management Centre dinna tura hmunhma buatsaih hrang hrang thawh zawh tawhte bakah puitlin a nih theih nan ruahmanna siam a nih thu sawiin, financial year tharah UD&PA Department kaltlanga hmalak chhunzawm tum a ni, a ti a. Khawpui a than ang zelin kan khawsaknain a kentel bawlhhlawh pawh a pung a, heng bawlhhlawhte hi mumal tak leh awmze neia sawngbawl a pawimawh tawlh tawlh dawn a ni, a ti a. Khawtlang tana rotling leh chhawr tangkai tur a nih avangin ngaih pawimawh a nih thu a sawi bawk. 


Khawzawl Darngawn-a Solid Waste Management Centre sak mekna ram Pengpui tlanga mi hi Darngawn Village Council-in UD&PA Department hnena an pek a ni a. Solid Waste Management Centre Khawzawl siamna tur project, Land Development for Solid Waste Management Centre, Khawzawl tia vuah vawiina  Deputy CM in a tlawh hi Special Central Assistance 2020-2021 sum cheng nuai 60 senga siam a ni a. Solid Waste Management Centre Khawzawl tih changtlun nan hian kawng hrang hrangah land development tih tawh a ni. 


Tun dinhmunah kawngpui atanga a hmun panna approach road chu RCC in metre 400 a thui, metre 3.5 a zau siam zawh tawh niin, internal road metre 200 a thui siam a ni tawh bawk a. A luh tanna Main Gate, bawlhhlawh tawih thei leh tawih thei lo thliar hranna Segregation Platform (45 m x 38 m), Site Office leh RCC Water Tank Litre 27,000 dawngte siam tawh niin, a hungna metre 150 a thui siam a ni tawh bawk. 


Solid Management Centre Khawzawl a tlawh zawh hian Deputy Chief Minister Pu Tawnluia chuan Khualen khua a tlawh a, BNRGSK Hall-ah vantlang inkhawm hun a hmanpui a; khawtlang mamawh leh tul angte sawiho niin, hmalak dan turte pawh ngaihtuahho a ni bawk. 


Deputy Chief Minister Pu Tawnluia, Tuichang bialtu MLA ni bawk hi Pu C.C. Lalchhuangkima DC, Pu Lalvenhima Addl. DC leh Official dangten an tawiawm a ni.