Khawzawl, the 24th March, 2022: Deputy Chief Minister Pu Tawnluia, Tuichang AC bialtu MLA chuan vawiin khan Khawzawl khawpui chhunga Sawrkar hmasawnna ruhrel siam mek leh hmachhawp hrang hrangte tlawhin a enfiah a, DRDA Office sakna tur lungphum a phum bawk. Pu C.Lalmuanpuia, MLA, Vice Chairman, Veterinary, Fishery & Sericulture Board chuan Deputy CM hi a tawiawm a ni.

Pu Tawnluia chuan hmasawnna ruhrel hrang hrang thawktu leh viltute chu sulhnu pawr lo leh mam tha, nakin zela chhawr tangkai zel theih tur hmathlir thiam turin a hrilh a. Hunbi tuka zawh hman a nih theih nan thal chhung ngei, fur tlak hmaa theihtawp chhuaha tanla turin a chah a ni. Hmasawnna ruhrel siam tul pawimawh tak takte chu a tahtawla ruahmanna siama thawh tum a ni, a ti a. Thingtlanga chengte tihhmasawn kawnga khaipa DRDA Pisa sakna lung phum a ni leh hna tan chhoh mek zel a ni chu lawmawm tiin, District tharah Pisa awm turte remchang ang zela din chhoh mek zel a nih thu sawiin, a dangte pawh ngaihtuah zel a ni ang, a ti bawk. A bial chhunga harsatna leh mamawh a hnena thlente chu a pawimawh leh mamawh ran dan ang zelin ngaihtuah a nih tur thu a sawi bawk.

Deputy Chief Minister hian Mualvawm Field Astro Turf phah leh Pavillion siam mek te, a panna kawng siam dan tur te, metre 720 a thui Zuchhip veng Jubilee Kawn leh KST Road inkalpawhna siam tur te, Government Khawzawl College leh Dinthar Venga DC Complex sak mek te, DIG Eastern Range Office leh Residence sakna tur hmunhma te, Farmual Road siam mek te, Vengthara Auditorium sakna tur te, Electric Venga Basketball Court siam tum leh CMO Office & District Hospital, Khawzawl te a tlawh bakah DRDA Office sakna tur lungphum a phum a ni.

Khawzawl Mualvawm Field cheibawl nan hian 'Improvement of Mualvawm playground with laying of Astro Turf' tih project hnuaiah avaiin cheng nuai 700 ruahman a ni a, Syncotts International ten an thawk mek a, a hungna tha tak leh a panna kawng siam tum a ni bawk. Pavilion hi UD&PA Department hnuaiah contractor dangin thawkin, cheng nuai 400 senna tur a ni a. Khawzawl District DC Office Complex tur hi Khawzawl khawpui chhung laili lai, Dinthar vengah cheng nuai 1000 senna tura sak mek a ni a, PWD Project Division III chuan enkawlin feet 149 a sei, feet 40-a zau, zopa chhiara chhawng li a sak tum a ni.

Cheng nuai 700 senna tur Auditorium pawh PWD Tlangah sak tum niin, sanction fel tawh tender tura buaipui mek a ni a. Electric veng PHE Department Office bulah cheng nuai 38 sengin Basketball Court siam tum a ni bawk a. Cheng vaibelchhe 3.346 senga sak tur Khawzawl Hermon venga Chief Medical Officer (CMO) office sak hna hi Lushai Engineer Consultancy ten thawkin, chhawng li a sak tur a ni a. Hna hi za zela 60 vel zawh tawh a ni. MGNREGS leh MLA Fund tangkawp kaltlangin cheng nuai 166.91 sengin DRDA Office sak hna Dinthar vengah thawh mek a ni bawk.

Deputy Chief Minister hi Pu C.C Lalchhuangkima, Deputy Commissioner; Pu PC Lalchunglura, SP; Line Department hotute leh khawtlang hruaituten an tawiawm a ni.

Ruahman dan chuan naktuk hian Chawngtlaiah RD Department kaltlanga Commercial Centre sakna tur lungphum a phum dawn a, Tualte Water Supply Scheme (WSS) a hawn dawn bakah Tomato chinna hmunte a tlawh dawn bawk a ni.