Khawzawl, 16th August 2023: Tukin khan Deputy Chief Minister Pu Tawnluia, Tuichang AC Bialtu ni bawk chuan Khawzawl Tuisenphaia FCI Food Storage Depot sak mek chu a tlawh a. Deputy CM hi Khawzawl DC, SP, EE (PWD), DCSO leh khawtlang hruaitu ten tawiawmin, Depot sa mek tu Contractor te nen leiminin a tihbuai Khawzawl FCI Godown hmun laih mek chinfel dan tur an sawi ho a ni.
Deputy Chief Minister chuan FCI Depot chu a chawm tur khawchhak tlangdung khaw hrang hrang te tan pawha pan nuam leh remchang a nih angin Khawzawl hmun ngeiah awm se tha a tih thu a sawi a. FCI Depot sak meka leimin vanga harsatna awm chu chinfel a nih theih nan theihtawp chhuah a tum thu sawiin; Food Civil Supplies & Consumer Affairs Department, Food Corporation of India leh Geology & Mining Department mithiamte nen a hmun ngeiah joint inspection neih ni se, a ti a. Depot hi leimin vanga sak zawm rem lo palh thei a nih avangin, Deputy CM hian Joint VC te chu hmun remchang dang lo zawng turin thu a rawn bawk a ni.
FCI Food Storage Depot, Khawzawl hi supply 3333 Metric Ton dawl zo tura ruahman a ni a. Mizoram khawchhak tlangdung - Champhai District leh Khawzawl District te chawm thei tura ngaih niin, June 2023 atang khan hnathawh tan a ni a. Project Estimate hi cheng nuai sangkhat zariat niin, Satyam Construction ten a sak hna an thawk mek a ni.
