Khawzawl, 16th August 2023: Urban Development & Poverty Alleviation changtu Deputy Chief Minister Pu Tawnluia chuan vawiin khan Khawzawl Vengthar PWD Complex-a ‘Khawzawl Auditorium’ sak tur lungphum chu a phum.
Lungphum phum puala Khawzawl PWD Complex tuala inkhawm tawi hmanah thu sawiin Deputy CM Pu Tawnluia chuan Khawzawlin Auditorium changtlung leh felfai tha tak a nei tur chu a lawmawm hle a ni, a ti a. Khawzawl District tana hna thawk thei tura a chunga duhsakna lantir thin tu District mipui te hnenah lawmthu a sawi bawk. Vawiina lungphum phum tak Auditorium chu khawtlang tanrualna,inunauna leh pumkhatna thlen tu a nih theih nan sak tan a nih atangin neitu thinlung pu theuh turin kalkhawmte chu a chah a. Neitu thinlung put hi ram leh hnam, chhungkua leh khawtlang hmasawnna bulthut a ni, a ti. District chhunga hmasawnna chuan changkang zawnga ngaihtuahna thar neih duhna mipuite thinlungah a tuh zel a ni tiin, midang inphak loa inhriatna ti bovin hma lam atan thlirna eng ‘positive thinking’ a neih tir a ni, a ti bawk.
Deputy Chief Minister chuan Tuichang Assembly Constituency chhungah Urban Development & Poverty Alleviation enkawl Urban Town pahnih Khawzawl leh Khawhai an awm thu leh Biate chhiar telin Khawzawl District huamchhungah Urban Town pathum an awm thu a sawi a. Khawpui tih changkan, tih changtlun leh tih thianghlim kawngah chak takin UD&PA chuan hma a la zel a ni, a ti a. Khawzawl Mualvawm Ground-a phullem phah te, Dinthar Venga Volleyball Court, Khawzawl Vengthar Badminton Court cheithat te chu rampum huap inelna thleng theia siam an ni chu lawmawm a tih thu sawiin, Mizoram- hmasa ber ni turin Khawzawl Electric Vengah Interlocking Polypropylene Tiles hmangin Basketball Court tha tak siam a nih thu a tarlang a. Mualvawm field sirah phullem phah mek a nih thu te, khawlai cheimawina leh faina kawngah tuiluankawr leh step engemaw zat siam a nih tawh thu te, Khawzawl District-in ‘Mizoram Cleanliness Competition 2022’ ah District fai ber lawmman Khawzawlin a dawn thu te, Biate leh Khawhaiin ‘Other Urban Town category’ ah khaw fai lawmman pahnihna leh pariatna an dawn thu te, Zuchhip Multipurpose Hall sak tan a nih tawh thu bakah Home Compost leh Individual Latrine engemawzat siam a nih tawh thu a tarlang bawk.
A department chan dang Public Health Engineering chuan mipui ten tui thianghlim in tur an neih theih nan chak takin Khawzawl District-ah hma a la mek zel tih Deputy Chief Minister hian a tarlang bawk a. Tuichang AC huamchhunga khaw tinah tui lak hna chu zawh thawkhat a nih tawh thu sawiin, Khawhai, Riangtlei leh Vangtlangah te chak taka hna kalpui mek a ni, a ti a. Khaw kawtkai mai ni lo, mipuite inchhung ngeiah tui lakluh theih a ni chu lawmawm a tih thu a sawi a ni.
Deputy Chief Minister hian Khawzawl District mipui ten hriselna kawnga hma an sawn theih nan District Hospital changtlung tak neih chu a ngaihpawimawh thu a sawi a. District Hospital chu ‘formal notification’ hmanga puan ni tawh mah se, thawktu indaihlohna tam tak te phuhruk a ngai a, hei hi Health Department, Finance Department leh DP&AR te nena tangkawpin chak taka hma lak mek a ni, a ti bawk.
He hunah hian Khawzawl DC Pu K. Lalrohlua pawhin thu sawiin Khawzawl District-in hmasawnna hrang hrang a hmu chho zel chu lawmawm a tih thu a sawi a. Kum li awrh chauh a upa la ni mah se, Khawzawl district hmasawnna chu hmangaihna nena enkawltu Pu Tawnluia zarah chak takin a kal zel a ni, a ti. Vawiina lungphum phum tak Auditorium chu tha taka enkawl zel turin Khawzawl mipuite a chah bawk a ni.
Khawzawl Auditorium hi UD&PA Department kaltlangin state sawrkar fund cheng nuai 642 (₹ 6,42,92,565) senga sak tura ruahman a ni a. Auditorium hi chhawng thum a sang tur niin, ground floor-ah hian motor 27 lenna tur vehicle parking, cafetaria, chowkidar quarters, plant room te a awm dawn a; first floor-ah mi 368 lenna main hall, Changing room, Conference Hall leh VIP Lounge te a awm dawn a; second floor-ah hian gallery mi 141 thutna awm bawkin, a vaiin mi 509 an thu thei dawn a ni. Floor tinah hian mipa leh hmeichhe inthiarna a awm bawk ang.
Lungphum phumna program hi UD&PA Secretary Pu Lalmalsawma Pachuau chuan a kaihruai a, Joint Director (P) Pu Andrew Lalhruaia chuan Technical Report a pe a, Director Dr. Andrew H. Vanlaldika chuan lawmthu sawina hun hmangin inkhawm hi tihtawp a ni.
