Khawzawl, 1st August, 2023: Vawiin khan District Civil Supplies Officer, Khawzawl District Office thar chu Deputy Chief Minister, bialtu MLA ni bawk Pu Tawnluia chuan khuallian niin a hawng a, FCS&CA Minister Pu K. Lalrinliana chuan khualzahawm niin a hmanpui a ni.
Khawzawl Electric Veng YMA Hall-a hawnna inkhawm buatsaihah thu sawiin khuallian Pu Tawnluia chuan DCSO Office hawn a ni ta chu lawmawm a tih thu leh District fuke kim nihna kawng Khawzawl-in a zawh mek zel a ni, a ti a. Chief Minister, FCS&CA Minister leh Department a thawktu ten chak taka hma an lakna zarah DCSO puitling deuha hawn a ni chu lawmawm a tih thu a sawi a. District thar pathum zinga Khawzawl DCSO hawn hmasak ber a ni chu District aiawhin lawmthu a sawi bawk.
Pu Tawnluia chuan sawrkarin District thar te hmasawnna leh changtlunna a ngaihpawimawh thu sawiin District tharah district office tam ber chu hawn a ni tawh a ni, a ti a. Covid hripui lengin hmasawnna hna thawh khaihlak mah se sawrkarin District thar te tuaihnumna kawngah sawrkarin hma a la tha thawkhat ni a a hriat thu a sawi a. District Transport Office (DTO) leh District Local Administration Office (DLAO) pawh hawn tum a hmalak mek a nih thu bakah Khawzawlah FCI Kudam sak mek a nih thu leh Khawhaiah Supply Kudam cheng nuai 30 man sak mek a nih thu tarlang a. DCSO Office hawn thar chuan Supply thil-a Champhai kal ngai fo kha sukiangin, hmun leh hmunah Khawzawl District mipui ten an mamawh an ti fel thei tur chu thil lawmawm tak ni a a hriat thu a sawi bawk.
Deputy Chief Minister chuan sawrkar term kal mekah mipuite nitin mamawh – buhfai, gas, petrol leh a dang te phuhrukna kawngah Supply Department hnathawh chu fakawm a tih thu a sawi a. Hripui leng karah pawh chaw leh nitin mamawh hnianghnar taka kan nei thei kha an hna thawh that zia ti lang chiang tu a ni, a ti. Tunhma lama Supply Department hnuaia harsatna awm thin hrang hrang – buhfai tha lo te, Buhfai buk dik tawk lo te, Supply phurtute harsatna te chu a tlem tial tial nia a hriat thu sawiin, gas buk dik zawng pawn hma a sawn zel chu Department in theihtawpa hma a lakna rah a ni, a ti a. Mumal taka Consumer Goods chhawpchhuahna kawnga hma an lakna ah FCS&CA Department chungah lawm thu a sawi a ni.
Khualzahawm Minister Pu K. Lalrinliana pawhin thu sawiin Khawzawl a DCSO Office hawn a ni ta chu lawmawm a tih thu leh District thar dang pahnihah te pawh an hawng chho zel dawn tih a sawi a. Hmanni lawkah Fisheries Office pawh an lo hawn tawh thu leh Khawzawlah hmasawnna hmuh tur a awm reng chu lawmawm a tih thu sawiin bial tana thahnemngai tak MLA an nei chu vannei a tih thu a sawi a. Supply Department hnathawh ber chu Zoram mipui ei tur buhfai leh AAY chini buaipui a nih thu a sawi a, buhfai hi a vaiin Quintal 1,05,000 bawr vel sem chhuah thin a ni tih a sawi a. National Highway laih zauh hna thawh mek avang leh fur laia Truck kal theih loh khawp a kawng chhia awm thin avangte in harsatna te an tawk fo tih a sawi a, COVID peh fur laia an harsatna tawh te chu Dy. CM in a ngaihtuah thin thu leh an tanrualna leh hotute ngaihsakna avangin tun dinhmun an thleng thei tih a sawi.
Minister chuan an Sawrkar tirh khan kudam chhia 65 a awm a. Sak that an dil hnuah Kudam 10 sa thain, an sum hman bang hmangin Kolasib DCSO Office leh Quarter te an sak that thu a tarlang a. He mi hnu hian kudam 21 sak that hna thawk lehin, an sum hman bang hmangin Mamit DCSO Office thliin a len chhiat leh 4th. Grade Quarter te an sa tha leh a; Tunah hian Kudam 23 sak thatna tur an neih thu leh sawrkar kalphung thar hnuaiah anmahniin an enkawl theih loh avangin PWD kutah an hlan ta tih a sawi a. Tunhmain Kudam 55-ah buhfai an dah khawl thin thu leh National Highway kawng laih zauh mek avangin Kudam 70 chuangah Monsoon Stock dah a ni a, Buhfai hi dah rei lutuk chuan a chhiat duh avangin thla 3 ei an dah a, tunah hian Monsoon Stock hi an zo fel thawkhat tih a sawi a ni.
He hunah hian DC Pu K. Lalrohlua pawhin thu sawiin Khawzawl District-in hmasawnna chi hrang hrang neiin tunhnaiah pawh Office thar engemawzat hawn a ni chu lawmawm a tih thu a sawi a. DCSO Office chauh an hawng dawn emaw tih laia DCSO an pe tel chu lawmawm a tih thu sawiin, DCSO Office tha taka a kal chhoh theihna turin a tul anga tanpui turin District Administration leh Head of Department te pawh an inpeih tih a sawi a. Hei bakah hian Khawzawlah Grace Camping Centre din a ni a, tha taka kalpui a nih theihna tura Grace Camping Centre in Institutional Ration Card an neih theihnan hmalaksak turin Supply Department hotute chu a ngen nghal a ni.
Vawiin Programme hi FCS&CA Department Secretary Pi Teresy Vanlalhruaii chuan a kaihruai a, Pu Lalmuansanga Ralte, Joint Director chuan Technical Report a pe a. FCS&CA Director Pu Andrew H. Vanlaldika chuan lawmthu sawina hun hmangin inkhawm hi tih tawp a ni.
Khawzawl DCSO hi FCI Kudam hlui bul, Khawzawl Hermon Vengah a awm a. DCSO tur hian Pu J. Vanlalchhuanga dah niin a hovin staff pali an awm dawn a, an enkawlna hnuaiah hian Kawlkulh Principal Distribution Centre (PDC), Khawzawl Sub-Distribution Centre (SDC) bakah khaw panga Biate, Sialhawk, Rabung, Lungpho leh Khawhai-a Fed Centre te a awm dawn a ni.
