Khawzawl, the 12th August 2022: Mizoram Badminton Association leh Khawzawl District Badminton Association buatsaih Mazuala Memorial 36th MBA Official Championship Senior -2022 kharna hun chu vawiin chawhnu dar 1:00 khan Vengthar Branch YMA Hall-ah Deputy Chief Minister Pu Tawnluia'n khuallian niin a hmanpui.
Khuallian Pu Tawnluia chuan a fapa Mazuala hriatreng nana Mizoram Badminton Association leh Khawzawl District Badminton Association tangkawpin Badminton Championship a buatsaih chu lawmawm a tih thu a sawi a. Badminton infiamna chu khua, district leh state level-ah theihtawp chhuaha tih chhoh zel a tul thu sawiin, heta tang hian national leh international level-ah hlawhtlinna chang thei turin thalaite chungah beiseina sang tak sawrkarin a nei a ni, a ti bawk.
Infiamna chawikan nan sawrkar pawhin Sports policy mumal tak a duan thu leh international level thlenga thalaite chherchhuah tum a nih thu sawiin, Sports Council hnuaiah Association hrang hrangte felfai takin an inenkawl mek a, chumi rah chu kan seng tan mek a ni, a ti a. Tunhnai Common Wealth Games Weightlifting Gold Medalist Jeremy Lalrinnunga leh Hockey Bronze medalist Lalremsiami te hmangin mizoten hming kan chher thu tarlangin, football phei chu mi tam takin eizawn nan an hmang mek a ni, a ti a. Hma kan sawn zel theih nan sawrkar pawhin theihtawp a chhuah mek a ni, a ti bawk.
Infiamna huangchhunga tunhnaia Khawzawl District hlawhtlinna chan hrang hrangte sawiin, football-a Sialhawk leh Volleyball-a Khawhai khuate hlawhtlinna chhuanawm a tih thu sawiin, tun hnaia Khawzawl khuain Sports inelna lian hrang hrang a thlente leh hmachhawp awmte chuan hmasawnna nasa tak a pek ngei a beisei thu a sawi bawk a. Khawzawl Mualvawm Field-ah phullem phah tha tak kan nei tawh a, Futsal Ground tha tak siam kan la hmabak a, Basketball Court Mizoram pum huap inelna thlen theihna tur pawh siam tan mek a ni, a ti a. Kawnzar Field (Khawzawl Field No. 2) ah Sport Complex siam tumin hma lak mek a nih thu a sawi bawk a. Infiamna huanga theihna sang tak nei Khawzawl District-in hma kan sawn zel theih nan theihtawp chhuah zel ang u, tiin District mipuite a sawm a ni.
Khuallian chuan infiammi kalkhawmte chu ruihhlo leh a kaihhnawih laka fihlim tum tur leh midangte zirtirtu nih tum turin a fuih a. Hlawhchham vawi khat avanga beidawng mai lovin hlawhtlinna hmuh hma chu beidawng lova kal zel turin a chah a. Lawmman dawngtute zawng zawngte lawmpuina a hlan a, inelna a tel zawng zawngte chungah lawmthu sawiin duhsakna sang ber a hlan a ni.
He hun hi Pu Lalsanglura Hnamte, Khawzawl District Badminton Association-in a kaihruai a, Pu C.C. Lalchhuangkima, Khawzawl District Bawrhsap leh MBA atangin Pu Laltanpuia ten thu an sawi bawk a. Pu PC Lalchhanchhuaha, Organising Secretary-in lawmthu sawiin hun hman a khar a ni.
He tournament hi Tuichang bialtu MLA Pu Tawnluia, Deputy CM te chhungkuain an fapa Mazuala hriatrengna tur atana an Sponsor niin, LTM Filling Station chu Co-sponsor a ni a, Mizoram District hrang hrang atangin badminton khel thiam tak tak player 150 bawr vel an fuan khawm a. Inelna hi Category 9 ah August ni 9 atanga ni 12, 2022 chhungin Khawzawl Vengthar YMA Hall-ah neih a ni.
Deputy Chief Minister hian vawiin vek khan DC Office tualah Khawzawl DC Office kum 3 tlin (2019-2022) lawmna hun a hmanpui a. Hemi hnu hian SP Office tlawhin inkawmhona hun a hmanpui bawk.
Pu Tawnluia hi Dy. CM hi Pu C.Lalmuanpuia, MLA, Veterinary, Fishery & Sericulture Board Vice Chairman; Pu D.Thangliana, Ex-MLA; Pu C.C. Lalchhuangkima, DC; Pu Lalchhuanthanga, SP leh Pu Ruatsanga Ralte, Commandant 2nd IR Battalion ten an tawiawm a ni
