Ni 27.10.2022 chawhma dar 11:00 khan Khawzawl Zaingen YMA Hall-ah Faina Beihpui Thlak Programme hman a ni a, he hun hi Deputy Chief Minister Pu Tawnluia, Bialtu MLA chuan khuallian niin a hmanpui a, Khawzawl khawpui chhunga chhungkaw tin tan Bawlhhlawh bawm - bawlhhlawh tawih thei leh thei lo paihna tur a sem chhuak a ni.
He hun District Bawrhsap Pu C.C. Lalchhuangkima kaihhruaiah hian khuallian Deputy CM Pu Tawnluia chuan thu sawiin, faina beihpui thlakna chuan rah tha a chhuah ngei a beisei thu leh he huna telte pawh faina lama zirtirtua an tan a beisei thu a sawi a. India ramah hian faina chungchanga hmalakna hi hmun hnihah hai then phawk a ni a, tuna faina beihpui thlak hi India Sawrkar atang pawhin Swacch Bharat Mission an ti a, Clean India Programme siamin kum 5 kalpui a ni tawh tiin, nikum atang khan Swachh Bharat Mission 2 (SBM 2) a intan leh tawh a ni a ti a. SBM hian a tum chu India rama chengte pawnlera inthiar awm lova mahni inchhunga zunram thiarna an neih vek hi a ni, a ti bawk. SBM enkawlna chu thingtlang leh khawpuia then hran anih thu sawiin, thingtlang lama hmalakna Swacch Bharat Mission Gramin enkawltu chu PHE Department anih thu leh, Aizawl khawpui leh District Capital bakah Mizoram Sawrkarin Town-a a puante chu Swachh Bharat Mission Urban tih an nih thu a sawi a. Khawzawl pawh District Headquarters anih angin leh Town anih avangin Urban hnuaiah awmin UD&PA enkawlna hnuaiah a awm mek a ni, a ti bawk.
Dy. CM chuan Khawzawl khawpuiah Faina Beihpui Thlak Programme neih ni mah se a ti hlawhtling tur chuan Sawrkar atanga Order chhuah leh inkaihhruaina pek ringawt a tawk lova, faina nei tur chuan a hmasa berin mi thinlungah faina pawimawhzia leh fai duhna thintlung a awm phawt a ngai a, faina lamah hian a mawhphurtu ber leh hma la nasa ber tur chu keimahni mimal theuh hi kan ni a ti a. Bawlhhlawh tawih thei leh thei lo thliar hran chu faina lama hmalak bultanna anih thu tarlangin, Khawzawl khawpuiin faina lama hma kan lak theihna turin leh hmalak bul lo tan tawh tiphuisui turin bawlhhlawh bawm in tinah pek tum anih thu a sawi a. Faina lamah Khawzawla entawntlak taka hmalak anih zel theih nan tawih thei leh thei lo paihna tur siam tuma hmalak anih thu pawh he hunah hian sawilangin, District Headquarters-te fai inelna neih hnuhnung bera Khawzawl 4-na a ni chu a la sang tawk lo tih sawiin, kan tum ber chu faina leh thianghlimna anih rualin thianghlimna lama kan tanlaknate chu mite entawntlak turin hmahruaitu-ah Khawzawl khawpui i tang teh ang tih hi a ni, a ti bawk.
Thu a sawi zawh hian Deputy Chief Minister hian Khawzawl khawpui chhung veng hrang hranga thlan chhuahte hnenah bawlhhlawh bawm te a sem a, hemi hnu hian veng hrang hranga sem chhuah turin vengtin VC te hnenah a hlan leh a ni. Vawiin hun hmanah hian DUDO, DRDO Project Director leh Khawzawl Joint VC Chairman te'n faina lama hmalakna an kalpui dante an tarlang bawk.