Khawzawl, the 6th March, 2023: Mizoram Khawpui Fai Intihsiakna (Mizoram Cleanliness Competition) 2022 kaltlanga District Headquarters Category huang intihsiaknaa pakhatna dinhmun hauhtu, Khawzawl chuan vawiin chawhnu dar 1 khan a lawmna hun Zaingen Branch YMA Hall-ah an hmang. He hun hi Deputy Chief Minister Pu Tawnluia, UD&PA Minister leh bialtu MLA ni bawk chuan khuallian niin a hmanpui a ni. Khawpui chhunga VC hrang hrangten an huam chhung khawlaia an hun tur hnawmbawm lian a sem chhuak nghal bawk. 

Khuallian Deputy Chief Minister Pu Tawnluia chuan zoram pum huapa fai intihsiakna kum 2022 a neihah District Hqrs. fai intihsiakna huangah Khawzawl khawpuiin pakhatna dinhmun a hauh thei leh, Khawzawl Dinthar VC-in District Hqrs. chhunga VC fai ber nihna dinhmun a hauh chu lawmawm a tih thu sawiin, Khawzawl mai bakah Biate leh Khawhai ten faina kawnga dinhmun tha tak an hauh chu lawmawm a tih thu a sawi a. Fai ber nih lawmna hun chu changkang a tih thu sawiin, faina leh thianghlimna chu hmasawnna kawnga pawimawh tak a ni, a ti a. Faina kawnga inzirtirna leh inkawhhmuhna tam zawk neih zel a pawimawh thu sawiin, faina chuan thianghlimna, mawina, rimtuina leh hriselna thlengin a siam thin a ni, a ti a. Fai reng turin taimak a ngai a, taksa, in leh a vel leh vantlang hmunte vawng fai reng turin thahnemngai taka thawhho tlan a pawimawh thu sawiin, Department kutah dah mai lova kan zavaia tanrual a ngai a ni, a ti bawk.

Deputy CM chuan a enkawl Department pahnih, PHE leh UD&PA Department kaltlangin thingtlang leh khawpui faina beihpui thlak a nih thu a sawi a. District naupang tak Khawzawl District-in faina kawnga entawntlak taka hma a la leh result duhawm tak a nei chu fakawm tiin, a hlawhtlin theihna tura Official, Department, VC, NGO leh mipuite inpekna chhuanawm a ti a. Thlen chinah lungawi mai lova, tun dinhmun aia sang zawk ngaihtuah chunga hmasawn zel tura tanlakpuiah District mipuite a sawm a. Khawzawlah bawlhhlawh thliar hranna kalpui a ni chu hmasawnna pawimawh tak a nih thu sawiin, faina chu naupangte atanga tana inzirtir a tul thu a sawi a. Bawlhhlawh paih mai turte atanga thil hlu leh tangkai zawk siam a nih theih nana hmalakna chu ngaih pawimawh zual deuh deuh a duh thu a sawi bawk a. Hnawm thliar hranga sawngbawlna hmun Solid Waste Management Centre, Urban Town hrang hranga siamna tur cheng vaibelchhe 10.5 hu project Sawrkarin North East Special Infrastructure Development Scheme (NESIDS) hnena a thehluh pawm tawh a ni a, heng bakah hian hemi atana hmalakna tur atan State budget atang pawhin cheng vaibelchhe 50.45 dah a ni, a ti a. Individual Household Toilet 7,000 chuang siam tum a nih thu leh, Khawzawl tan 400 dah a nih thu a sawi a. Vantlang inthiarna Community Toilet pawh Khawzawlah 2 vel siam tum a nih thu a sawi bawk a. Khawzawl mipuite chu faina ngaipawimawh chhunzawm a, hmalam pana theihtawp chhuah zel turin a sawm nghal bawk.

Thusawitu dang Pu H.Lianzela, Director, UD&PA Department chuan khawvel puma fai intihsiakna  lian ber, Swachh Survekshan hlawhtlin nan kum 2017 atangin Mizoram khawpui fai intihsiakna neih a nih thu a sawi a. Swachh Survekshan 2022 intihsiakna hnuaia Khawzawl dinhmun leh, Mizoram khawpui fai intihsiakna 2022 a Khawzawl dinhmun tlangpuite a tarlang a. Swachh Survekshan intihsiakna huangah North East State-te Zone khatah an awm thu sawiin, Khawzawl chu zonal ranking-ah 30-na, leh State ranking-ah 5-na a nih thu a sawi a. Kum 2018 a ODF a puan tawh Khawzawlin ODF Plus dilna an thlen chu endik thuai tum a nih thu a sawi bawk a. Faina chu hun reilote chhung atan chauh nilo, mitin huapzo, nakin thlenga chhawmnun zel theih leh nunpui tlat theih tur zawnga kalpui thiam a tul thu sawiin, Khawzawl mipuite theihtawp chhuah zel turin a chah a ni.

Pu Ngurthansanga, DUDO Khawzawl tarlan danin VC leh mipuite nena tanrualna kaltlangin Khawzawl khawpui chhungah kar tin ni 6 chhung bawlhhlawh tawih thei leh thei lo te a hranga  khawn thin a ni a. DRDO leh BDO Office-te nena tangkawpin home compost pit 700 siam tawh a ni a. Khawzawl khawpui chhunga Sawrkar Office 9 te Single Use Plastic (SUP) free-ah an inpuang tawh a. October ni 17, 2022 atangin Khawzawl khawpui chhungah bawlhhlawh paih hmaa thliar hran hna kalpui tan a ni. 

He hun hi District Bawrhsap Pu C.C. Lalchhuangkima chuan a kaihruai a. Pu JH. Lalhriatzuala, Local Ambassador, Khawzawl Dinthar-in hunserh a hmang a. District Hqrs. hrang hrang chhunga VC fai ber lawmman dawngtu Khawzawl Dinthar Village Council hnen atangin report ngaihthlak a ni a. Pu K.Vanlalsiama, Chairman, Joint VC Khawzawl hnen atanga thu sawi ngaihthlak a nih hnuah, Pu Lalvenhima, Project Director, DRDO Khawzawlin lawmthu sawiin hun hman hi a khar a. District khawpui zinga fai ber nih lawmna ruai theh a ni bawk. 

India Republic Day 2023 lawmna Aizawla neihah UD&PA in Mizoram khawpui fai intihsiakna 2022 a buatsaih lawmman a sem chhuahah khan Khawzawl khawpui chuan Category-III, District Hqrs. zinga fai ber nihna dinhmun a hauh a, hei hian lawmman pawisafai Rs. 3,33,333/- leh Citation a kengtel a. Khawzawl Dinthar Village Council chuan District Hqrs. chhunga Village Council faina kawnga thawk tha Best Village Council lawmman pawisafai Rs. 77,777/- leh Citation an dawng a. Heng bakah hian Khawzawl District Biate khua chuan Category -III (Urban Towns) hnuaiah pahnihna dinhmun hauhin, lawmman pawisafai Rs. 2,22,222/- leh Citation an dawng a ni.  Mizoram khawpui fai intihsiakna kaltlang hian Khawzawl khawpui chuan kum 2020 ah 3-na leh 2021 ah 4-na dinhmun a lo hauh tawh a, kum 2022 ah pakhatna dinhmun a hauh a ni. 

Khawpui fai intihsiakna-ah hian Mizoram khawpui (Notified Towns) 28 te Category 3 ah then hran an ni a. Category-l ah hian Aizawl khawpui chhunga AMC Ward hrang hrang 19 te an intihsiak a. Category-II ah hian District Headquarters 10 te an tel a. Category-III ah khawpui dang zawng (Urban Towns) 17; Vairengte, Tlabung, N. Kawnpui, Thenzawl, N. Vanlaiphai, Darlawn, Zawlnuam, Biate, Khawhai, Sairang, Lengpui, Bairabi, West Phaileng, Kawrthah, Ngopa, Phullen leh Farkawn te an tel a a. Category tinah hian lawmman pakhatna atanga pathumna siam a ni a, hei bakah hian Category tin atangin Best LC/VC thlanchhuah a ni a, hmasawn chak ber Fastest Mover Awards pawh siam a ni bawk.

Deputy Chief Minister Pu Tawnluia chuan tukin khan Arro khua tlawhin BNRGSK Hall-ah vantlang inkhawm hun a hmanpui a; khawtlang mamawh leh tul angte sawiin inkawmhona hun hman a ni a, hmalak dan turte pawh ngaihtuahho a ni bawk.