Khawzawl, the 13th January, 2023: Vawiin chawhma dar 11:00 khan Khawzawl District Bawrhsap Pu C.C. Lalchhuangkima, District Election Officer ni bawk chuan DC Conference Hall-ah 22-Tuichang Assembly Constituency Electoral Roll thar ber a tlangzarh a, Electoral Roll thar ber Copy hi Political Party aiawhte, BLO, AERO leh NGO te kutah a hlan nghal a ni.

District Election Officer Pu C.C. Lalchhuangkima chuan 22-Tuichang Assembly Constituency Final Roll 2023 tlangzarh a ni thei chu lawmawm a tih thu sawiin, November 2022 a Draft Electoral Roll 2023 tlangzarh anih hnu lawka Election Official-te thawhrimna zara Final Electoral Roll 2023 buatsaih fel a ni chu lawmawm a tih thu a sawi a. BLO, AERO, ERO, DC Election Staff, Political party leh khawtlang hruaitute tawiawmnaah lawmthu a sawi a. Mipa aia hmeichhe vote nei an pung nasa leh population punna a chak lo chu ngaihtuah tham a tlin thu sawiin, hei hian hnam angin tan kan lak a ngaihzia pawh a tarlang a ni, a ti bawk. 

Vawiina Final Electoral Roll, 2023 tlangzarh takin a tarlan danin 22-Tuichang AC ah hian voter 17,398 (mipa 8,677 leh hmeichhia 8,721) an awm a, mipa aia hmeichhe vote nei tamna zat hi 44 a ni. Draft Roll-a voter awm zat 17,242 aiin vote 156 (0.9%) in Final Roll-ah hian vote a pung a. Voter pun tamna ber Sialhawk - II Polling Station leh Khawzawl Hermon Polling Station-te voter 27 (0.16%) ve ve in an pung a. Khawzawl Vengthar South Polling Station chu vote 22 (0.13%) in a kiam thung a ni. Voter tamna ber Polling Station chu Khawzawl Vengthar North Polling Station niin, voter 1,013 an awm a; voter tlemna ber Arro Village Polling Station-ah voter 115 an awm a ni. 

He hunah hian EPIC thar a awm tawh dawn thu leh National Voters' Day-ah voter tharte hnenah pekchhuah hman vek tum anih thu tarlan a ni a. Final Electoral Roll tlangzarhna hunah hian Addl. DC, ERO, AERO, BLO te bakah Political Party aiawhte leh NGO hruaitute an tel a ni.