Khawzawl, the 11th September, 2020:

Vawiin khan Deputy Commissioner, Khawzawl District kaihhruaiin DC's office Conference Hall-ah meeting pawimawh tak tak pathum neih a ni.

 

1. Chawhma dar 11 ah Khawzawl District chhunga Thlasik thlai chin thin chu hlawk zawka kalpui chhunzawm dan tur ngaihtuahin Horticulture, Agriculture, Forest leh KVK atanga officer te bakah, Khawzawl leh a chhehvela leilet nei pawl heng - Tuisenphai zau, Tuifar zau, Phaitha zau leh Chawngtlai-a Farmers Society/Association aiawhte nen meeting neih a ni. He meeting ah hian kuthnathawktu pawl hrang hrangten kum kalta-a thlasik thlai an chin tawh dan leh an hlawkpui dan te, hmasawn theihna lai ni a an hriat te report an pe a. Hei hi Department officer te nen sawiho niin, thlai chingtute tana hlawk zawk leh chhawrnahawm zawk a nih theih nana hmalak dan turte sawiho a ni.

 

2. Chawhnu dar 1:30 ah Khawzawl District chhunga Covid-19 hrileng dona atana zone hrang hranga Incident Commander/Zonal Officer te nen meeting neih a ni. He meeting-ah hian Incident Commander te chuan an duty dan report pein, Covid-19 hri pung zel laka inven leh hmachhawn dan tur te ngaihtuah ho a ni a. DC chuan Incident Commander te chu thahnemngai taka thawk chhunzawm a, report a rawn luh hun chauh nghak lo a hmala thuai thuai thin turin a fuih thar bawk.

 

3. Chawhnu dar 3 ah Khawzawl town chhunga Village Council President tharte nen inkawmkhawmna neih a ni. He hunah hian DC chuan khawtlang leh district hmasawn nan a lungrual taka thawhpuiah VCP te chu a sawm a. VCP an nih mai piahlamah VLTF Chairman leh Village Level Disaster Management Committee (VLDMC) Chairman an nihna anga an thuneihna leh mawhphurhna hrang hrangte sawiho in, Covid-19 hripui dona kawnga thawhho dan turte thahnemngai taka sawiho a ni bawk.


Written by H. Lalramenga, SDC, Khawzawl District