Khawzawl, the 26^th November, 2021:

Vawiin khan Pu C.C Lalchhuangkima, DC Khawzawl chuan Riangtlei Community Hall-ah Riangtlei Branch YMA Platinum Jubilee (kum 75 tlin) lawmna hun chu Khuallian niin a hmanpui. 

Vawiina Platinum Jubilee lawmnaah hian chawhma dar 10:30 ah Jubilee Dar vuakna hun hman a ni a. Hetah hian Khuallian leh Riangtlei Branch YMA hruaitu ni tawh la dam lai zawngin Jubilee Dar vuakna hun an hmang a ni.

Hemi hnu hian Riangtlei Community Hall-ah ‘Hruaitu Chawimawina Inkhawm” hman zui a ni a, Riangtlei YMA hruaitu ni lai leh ni tawh te chawimawina Certificate thuziak mawi tak hlan an ni. 

He Platinum Jubilee Thupui atan hian ‘Aia Upa Zah’ tih leh ‘Taimakna’ tihte hman a ni a. Khuallian Pu C.C Lalchhuangkima chuan Jubilee Thupui chu tha a tih thu a sawi a. Thangthar zawkten Aia Upa zah hi zir thar a pawimawh tih sawiin Nu leh  Pa rilru tina thinten malsawmna an dawng ngai lo, a ti. Tin, Riangtlei chu khaw taima ti a hriat an nih ang ngeiin intodelh zel tur a tan la sauh sauh turin a fuih bawk. 

Jubilee thupui hi Pu Lalrelliana, Ex-President in fiah felfai takin a sawi bawk a ni. 

Platinum Jubilee lawmna program neih zawhah Khuallian Pu C.C Lalchhuangkima chuan Jubilee lungphun hawnna neiin, hemi zawh hian YMA Office ah YMA Branch hruaitute nen thingpui inhona an nei zui nghal a ni. 

Riangtlai Branch YMA Platinum Jubillee lawmna program hi zaithiam Nl. Marina Vanhriatpuii Varte pawhin a hmanpui bawk a ni.