Khawzawl, the 26th April, 2022: District Level Committee on African Swine fever (DLCASF) chu vawiin chawhnu khan DC Conference hall ah Pu CC Lalchuangkima, Khawzawl Bawrhsap  kaihhruaina in an thukhawm.

He inhmuhkhawm ah hian Dr C Lalsawithuama, DVO, Champhai chuan report a pe a. Khawzawl district ah 18.11.2021 hnu lamah hun rei tak chhung ASF case kan neih loh hnu in, he hri vangin 12.04.2022 khan Vengthar, Zuchhip, leh Darngawn vengah te vawk an thih thu a sawi a. Tunah dinhmunah sample 5  test turin an thawn thlak mek a, result an ngaihchan thu a sawi bawk. Khawzawl district bikah chuan 12.04.2022 atanga 26.04.2022 thleng a vawk thi zat chu 78 nih thu tarlan a ni. 

Meeting chuan ASF a darh zel loh nan Khawzawl district chhungah khawi hmun atanga mahin vawk leh vawksa lakluh phal loh nise, tin, district chhungah pawh khua leh khua inkarah vawk leh vawksa lakluh leh hralh chhuah khap nise tiin an rel a. Tin VC te leh vawk vulh pawlte thawhho puiah sawm nise tih a ni. DVO lamin mipuiten a kan hriatthiam theih turin "bio-security preventive measures" chi hrang hrangte puanzar nan hmalak nise tih a ni bawk a. Heng bakah hian, vawk thi an awm chuan tha takin (6ft a thukah) chinai nen phum thin tur a nih thu sawi a ni. Khauh lehzuala vawk hri ASF a darh loh nan a hmalak zui zel an rel a ni.