Khawzawl, 15th August 2023: Vawiin khan Deputy Chief Minister, Tuichang AC bialtu MLA ni bawk Pu Tawnluia chuan Khawzawlah Independence Day puala Khawzawl District Football Association te buatsaih ‘Deputy CM Trophy Inter-Village Football Tournament’ chu khuallian niin a hmanpui.
Deputy CM chuan Khawzawlah hlawhtling taka I-Day Football Tournament neih a ni thei chu lawmawm a tih thu a sawi a. Sawrkarin nakina ram hruaitu tur an nih angin thalaite hmasawnna a ngaipawimawh em em a, chuvangin thalaite chu sawrkar hmalakna te hmawrbawk tu ni a Khawzawl khua mai ni lo Mizoram tihmingthatu nih tum zel turin a chah a. Sports chu nunphung zirtirtu pawimawh tak a ni, khuallian hian a ti bawk.
Vawiina final khelhna tur Mualvawm Field chu changtlung taka grass leh pavilion siam a nih tawh thu tarlangin Deputy Chief Minister chuan a tuaihnum zel pawh sawrkarin a tum tih a tarlang a. Mualvawm Field sirah Futsal Ground siam mek niin, khelmual sir hungna tur work order pawh tih chhuah a ni tawh a ni, a ti.
Deputy CM Trophy-ah hian Khawzawl khawchhung team 10 leh khaw pawn team 13 an tel a. Final-ah hian Khawzawl Zuchhip VC Team leh Khawzawl Vengthar VC Team inkhelin, Vengthar VC Team te hian hian hnehna an chang a. Champion Team hian nomawi bakah ₹50,000 dawngin, pahnihna hian ₹25,000 an dawng a ni.
