DAWR, SA LEH THLAI ZAWRHNA ETC. HAWN CHUNGCHANGA INKAIHHRUAINA

(24.05.2021 – 31.05.2021)

 

1. A hnuaia tarlante hi Thawhlehni (Tuesday) leh Zirtawpni (Friday)-ah te tlai dar 5:00 thleng hawn theih a ni ang.

a) Eichawp dawr.

b) Thlai, chawhmeh leh sa zawrhnate.

Heng dawr/thil zawrhna hmuna zawrh tur bungrua te hi VLTF te hriatpuina-in Thawhtanni (Monday) leh Ningani (Thursday) zan dar 8:00 alanga zing dar 4:00 inkarah distributor/wholesaler ten retailer (zuar chhawng turte) hnenah an sem thei ang. Amaherawhchu, distributor/wholesaler te kudam/dawra retailer (zuar chhawng tur) ten bungrua la tura an kal khap a ni.


2. Dawr dangte chu Thawhlehni zing dar 5:00 atanga tlai dar 5:00 thleng VLTF te hriatpuinain an inhawng thei ang.


3. Mipui (bazar turte) hriattur

 

  1. Bazar turte chuan facemask hmangin hmai an tuam ngei tur a ni. Hmai tuam lote chu dan angin pawisa chawitir an ni ang. 
  2. Chhungkaw pakhat atangin mi pakhat aia tam chhuah phal loh a ni.
  3. Bazar turte’n an awmna veng VLTF te hnen atangin chhuah phalna lehkha an la ang a, khualkhua atanga Khawzawla bazar turte chuan an rawn chhuah tanna VLTF hnen atangin phalna an la tur a ni.

 

4. Dawrkaite hriattur:

  1. Anmahni dawrtuten social distancing vawng chunga an dawr theihna turin dawr kawtah marking mumal tak an siam tur a ni. Marking siam lote chu dawr hawn phal a ni lo ang.
  2. Dawr kawngkaah hrui thlun tur a ni a, dawr chhungah a neitu/nghaktute bak luh phal loh a ni. 
  3. Dawrkaiten facemask hmanga hmai tuam vek tur a ni. 
  4. Dawr-a rawn kalte hming, address leh phone number te chu register-ah ziahluh zel tur a ni. 
  5. Anmahni leh a dawrtute hman tur hand sanitizer chhawp vek tur a ni. 

 

5. Sa leh thlai zawrh chungchang:

  1. VLTF ten an veng dinhmun leh mipui mamawhna thlir chungin a zawrhna hmun tur an ngaihtuah ang a, mipui pungkhawm tam lo tur leh social distancing kalpui theih turin ruahmanna an siam ang. VLTF te ruahmanna hi Covid-19 Executive Duty ten an tawiawm ang.
  2. Mizoram sawrkarin Khawzawl khawpui chu African Swine Fever affected area-ah a puan tawh avangin vawk talh emaw, a sa zawrh/lakchhuah khap a ni. 

 

6. Dawr inhawn hun chhung leh sa leh thlai zawrh hun chhung hi a rei tawk a. Hmanhmawh lutuk leh chuhhelh bik awm lovin, midang zai ngai chung leh VLTF te ruahmanna zawm chunga bazar theuh turin kan inngen e. Thu kan awih theuh chuan pungkhawm leh inhnawhbuai luih luih awm lovin mamawh kan inlamkhawm vek thei ngei ang.  

 

 

      Sd/- ZOTHANMAWIA 

Deputy Commissioner

&

Chairman,

District Level Task Force on Covid-19

Khawzawl District, Khawzawl