Khawzawl, the 11th January, 2022:

Vawiin khan Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District ruahmannain Covid-19 Zonal Officer ten Khawzawl District chhunga tunhnaia Covid-19 positive hmuhchhuahna khaw 15 (sawmpanga) an tlawh a, VLTF te nen inkawmin a tul ang zelin tanpuina pawisa fai  inhlan a ni bawk. 

Zonal Officer te hian Covid-19 positive case tam chhan te, positive mekte enkawl an nih dan te a hmunah kalin an enfiah a. VLTF leh khawtlang hruaitu dang te nen inkawmna hun neiin, Covid-19 hrileng dona kawnga an mamawh leh hmalak zel dan tur te an sawipui a. Positive awmna chhungkuaten eibar zawn kawnga harsatna an tawh theihte pawh zawhchian niin, Community Covid Care Centre (4C) te a hmunah tlawh nghal a ni a, equipment mamawh hrang hrangte endik nghal a ni bawk a ni. 

Khawzawl District chhunga khaw hrang hrangte hi Additional DC Pu Lalrohlua, SDO(Sadar) Pu James Lalnithanga, Pu Vantlangkhuma, Superintendent (DC's Office) leh Pu Biakchungnunga, Accounts Manager (DRDA) leh TBC Thanzawna, PHED JE ten bial insemin an tlawh a. Heng khua - Kawlkulh, Puilo, Chhawrtui, Rabung, Aiduzawl, Khualen, Ngaizawl, Khawhai, New Chalrang, Chalrang, Lungtan, Biate, Sialhawk, Chawngtlai, Tualte ah te hian VLTF leh khawtlang hruaitu dangten Zonal Officer hi an lo tawiawm a ni.

Written by H. Lalramenga, SDC, Khawzawl District