Khawzawl, 1^st November, 2021: 

Vawiin chawhnu dar 12:30 khan Khawzawl District Disaster Management Authority chu Khawzawl District chhunga Covid-19 inkhuahkhirhna kalpui dan tur ngaihtuahin an Chairman Pu C.C. Lalchhuangkima, Deputy Commissioner hovin DC Office Conference Hall-ah an thukhawm.

Khawzawl DDMA thukhawm chuan Khawzawl District chhunga Covid-19 inkhuahkhirhna order hman mek chu ennawnin, hun engemawchen chu District chhunga Covid-19 hrileng dinhmunin ziaawm lam a pan chhoh tawh avangin State sawrkar Order milin inkhuahkhirhna thenkhat chu her rem nise tiin a rel a. Damdawi dawr, eichawp dawr leh chawhmeh bazar te bakah dawr dangte chu Curfew hun chhung piahlamah chuan hunbi tuk awm lovin hawn phal a ni a, picnic spot leh public park te pawh zing dar 9:00 atanga zan dar 5:00 thleng hawn phal nise tih a ni bawk. 

Vawiina meeting-ah hian Pathian biak inkhawm chungchang pawh ngaihtuah niin, Biakina leng zat chanve (50% seating capacity) aia tam lo tan Covid-19 Appropriate Behaviour zawm chungin chhun leh zan inkhawm phal nise tih a ni a. Sports practice pawh State sawrkar Order zulzuiin indoor-ah mi 20 aia tam lo, outdoor-ah mi 50 aia tam lo tan phal a ni bawk. Chutihrualin sports inelna (tournament) buatsaih erawh phal rih loh nise tiin rel a ni thung a ni. 

District Headquarters chhungah chuan zan dar 9:00 atanga zing dar 4:00 thleng curfew puan chhunzawm a ni dawn a. Bungraw load leh unload chu tlai dar 4:00 atanga zing dar 7:00 chhungin phal a ni. Mipui punkhawmna heng – Anniversary/Birthday lawm etc.- te chu punkhawmna hmun tur VLTF te phalna la hmasaa huaihawt phal nise tia rel niin, Commercial Passenger Vehicle te pawh service pangngai aia tlan phal a ni dawn a ni.

Vawiina DDMA meeting-ah hian DDMA member-te bakah DC Office a Officer te, District Village Council Association leh Sub-Headquarters YMA hruaitute an tel a ni. 

Written by H. Lalramenga, SDC, Khawzawl District