Khawzawl, the 1st February, 2022:

Vawiin chawhma dar 10:30 khan District Disaster Management Authority, Khawzawl District chu an chairman Pu C.C. Lalchhuangkima, Deputy Commissioner ni bawk hovin DC Office Conference Hall-ah Covid-19 hrileng vanga inkaihhruaina ngaihtuahin an thukhawm.


 

District Bawrhsap Pu C.C. Lalchhuangkima chuan Khawzawl District chhunga Covid-19 active case tlahniam chu lawmawm a tih thu sawiin, sawrkar mite leh VLTF te thawhrimna bakah mipui thuawih vang a ni, a ti a. Covid-19 vangin hunrei tak chhung inkhuahkhirh tawh a ni a, mi tamtak eizawnna leh zirna in a tuar tih a hriatthiam thu tarlangin, tul tawpkhawkah lo chuan mipui nawlpui eizawnna tibahlah zawnga inkhuahkhirhna siam loh a tul thu a sawi a. Mizoramah Covid-19 hrileng a la pun zel vang erawh chuan inthlahdul vek theih a la ni rih lo a, tul lova punkhawmna siamte pawh a la rem rih lo tih sawiin, uluk taka ngaihtuahna seng turin DDMA member te a sawm zui a ni. 

Vawiina DDMA meeting-ah hian sakhaw biak leh inkhawm chungchangah Village Level Task Force leh Tualchhung Kohhran Committee ten an khua/veng dinhmun uluk taka thlir chungin thutlukna an siam ang a, inkhawm tura thu an tihtluk chuan chhunah, biaka leng zat chanve aia tam lo tan zai lovin inkhawm phal nise tih a ni a. Bazar, Dawr, hawker stall, beauty parlor, spa, lumehna, hotel/restaurant, gym etc. te chu uluk taka CAB zawm chungin zing dar 6:00 atanga tlai dar 5:30 chhung hawn phal tur niin, damdawi dawr te erawh khuahkhirhna awm lova hawn theih a ni dawn a ni. 

Khawzawl District chhunga Zirna in zingah board exam hmachhawn tur (pawl 10 leh pawl 12) ten uluk taka CAB zawm chungin school leh hostel an kal ang a, midang chuan online a zirna kalpui chhunzawm tur a ni. Sports practice chu indoor-ah mi 10 aia tam lo, outdoor-ah mi 25 aia tam lo tan neih phal niin, sports inelna/tournament, picnic spot, public park, swimming pool leh a huhova intihlim tura pawnchhuah (lui kal, trekking, adventure sport etc.) te erawh chu khap chhunzawm tur a ni thung a ni. 

 

Written by H. Lalramenga, SDC, Khawzawl District