Ni 23.08.2024 ah Department of Science & Technology-National Council for Science & Technology Communication (DST-NCSTC) leh Mizoram University bultum, “5-day Workshop on Towards a climate resilient society – Sensitization of climate change to the society through the intervention of visual art in Mizoram, India,” thawh 3-na, High School zirlai te tana buatsaih chu tunkar chhung khan Khawzawl District-a High School hrang hrangah neih a ni a, hemi pual hian Art exhibition neih a ni bawk.

Workshop on Climate Change hi Govt Chawngtlai High School, Tualte High School leh Govt Khawzawl High School-ah te nikhat zel hun hman a ni a, MZU, FoCUS – AH & VETY, Khawzawl leh KVK, Khawzawl-a mi thiam ten zirtirna an pe a. Khawvel sik leh sa inthlak chhoh dan te, a lo chingpen chhoh zel dan te zirtir an ni a. Sik leh sa chingpenin ran vulh lai leh thlawhhma lakna kawnga nghawng a neih theih dan te zirtir an ni bawk. Tin, sik leh sa chingpenin a nghawng tihziaawm nana changpat leiṭha pawimawhna leh a siam dan te zirtir an ni a, tin, intodelhna kawng pawimawh tak - mahni kutkawiha sahbon siam dan te zirtir an ni bawk.

Zirtawpni nilengin KVK Centre-ah Hands-on-Demo neih pui an nih bakah, KVK Meeting Hall, Khawzawlah Art Workshop leh Exhibition neih chhunzawm a ni a, High School zirlai ten Climate change chungchang zirtirna an dawn te Visual Art hmanga phochhuah dan zirtir zui an ni.

Art workshop-a an kutchhuak te hi KVK Hall-ah phochhuah nghal a ni a, zau zawka mipuiin hmuh theih turin MZU lama phochhuah leh tum a ni bawk. 

He project hnuaiah hian district hrang hrang pali-a High School thlan bikah seminar hi neih tur a ni a, District 3-ah neih a ni ta a ni. Zirtirna pe tur hian Mizoram chhung leh pawna Science zirna leh Research Centre-a thawkte sawm ṭhin an ni a. Tin, he project-in a ken tel, Visual Art hmanga sik leh sa danglam zel chungchang phochhuah dan hi Mizoram Academy of Arts, Aizawla zirtirtu ten an zirtir ṭhin thung a ni. Tin, Science kaihhnawih hmun remchangah zirlai te exposure trip neih pui ṭhin an ni bawk.