Chief Minister Pu Zoramthanga chuan ni 26.10.2022 khan Khawzawl DC office sak mek chu a hmunah tlawh in a enfiah a. Hei bakah hian hmalakna dangte an enpui bawk. Dy. CM Pu Tawluia leh Horticulture Development Board Vice-Chairman Prof. F. Lalnunmawia te'n an tawiawm a ni.
Khawzawl DC office sak hna hi chhawng li a awm dawn a., First floor, Ground floor leh Basement-I te hi 585.64 Sq.m a zau niin Basement-II hi 362.34 Sq.m a zau a ni a, total floor area hi 2119.26 Sq.m a zau a ni.
Khawzawl DC, SP leh Head of Office te bakah kawtlang leh tlawmngai pawl hruaitute'n Chief Minister chu lo hmuak in, Khawzawl district in hma a sawn zel a duhsak thu a sawi a. Mizoram chu ram dang nen inri a nih avanga thenawm ramte'n remna leh muanna an neih a pawimawh thu sawi telin, Myanmar ram buai chungchangah pawh India ram hruaitute hnena hma la tura a lo ngen tawh thu te a sawi a. Mizoram chuan remna palai kan nih theih thu a sawi.

Chief Minister hian Mualvawm football field tlawh bawkin, pavilion sak hna kal mek chu a enfiah a. Martarte thlan ah zahna pangpar a dah bawk.
DC Pu CC Lalchhuangkima, SP Pu Lalchhuanthanga te bakah Horticulture Department Director Pi Elizabeth Saipari leh thawktu dangte'n CM hi an lo dawngsawng.