Khawzawl, the 14th January, 2021


Nimin (13.01.2021) khan Pu Zoramthanga, Hon'ble Chief Minister, Mizoram chuan Khawzawl Deputy Commissioner's Office Complex lungphum phumin, District Horticulture Office a hawng. 


Khawzawl District tana mel lung pawimawh tak tak pahnih lawmna inkhawm tawi, Zaingen YMA Hall-ah neihah Chief Minister Pu Zoramthanga chuan thu sawiin, DC Office Complex lungphum phum chu district headquarters tur, sawrkar department hrang hrangin headquarters-a an neiha an awm khawm theihna tur a nih thu a sawi. Chief Minister chuan sawrkar office hrang hrang dawr tur ten hmun leh hmuna awlsam taka an dawr theihna tura ruahman a nih thu a sawi a. COVID-19 hrileng avangin sawrkarin pawisa nei tam thei rihlo mahse district headquarters sak chu ngaih pawimawh a nih avangin cheng nuai 1000 sanction sa a nih thu a sawi a, boruak tha a inher chhuah beisei chungin chak taka hna bawhzui tum a ni, a ti.


Pu JC Ramthanga, Addl. Chief Secretary in programme kaihruaiin, Chief Minister Pu Zoramthanga tawiawmtu Pu Tawnluia, Deputy Chief Minister, Pu Robert Romawia Royte, Minister of State, Prof. F. Lalnunmawia, MLA&Vice Chairman, Horticulture Development Board te bakah Khawzawl Joint VC aiawh te pawhin he hunah hian thu pawimawh tak tak an sawi a, zaithiam VL Daniala leh Nl. Lalrinpuii ten kalkhawmte an awi bawk a ni. Pu Zothanmawia, Deputy Commissioner in Vote of Thanks a sawi bawk.

He hunah hian Covid-19 vangin mipui nawlpui tel a remchan loh avangin Khawzawl District chhunga sawrkar official pawimawhte leh khawtlang hruaitute bakah political party leh NGO aiawh thlan bik mi tlemte an tel a. A hmunhma buatsaih leh refreshment te chu DC office kaihhruaina hnuaiah tluang taka zawh a ni.

Chipchiar zawkin DIPR website-ah: 

 https://dipr.mizoram.gov.in/post/chief-minister-in-khawzawl-dc-office-complex-lungphum-a-phum-a-dho-office-thar-a-hawng