Khawzawl the 25th November, 2021: 

Khawzawl RD Block leh Mizo Historical Village Chawngtlai bultumin vawiin khan Chawngtlai rama Tantinchhingi (Trantinchhingi) Khawpuitan hmunah 'Khawzawl District a Pipu te Sulhnu' tih thupui hmangin Seminar buatsaih a ni a, Seminar hi Khawzawl District Bawrhsap Pu C.C. Lalchhuangkima chuan khuallian niin a hmanpui a, Seminar-ah hian mi 11 in Paper an buatsaih te zirho a ni.

Khawzawl BDO leh Seminar Organizing Committee Chairman ni bawk Dr. Saithangpuia kaihhruaia Seminar Khuh Hawnna buatsaihah khuallian Pu C.C. Lalchhuangkima chuan thu sawiin, Khawzawl District a Pipu te Sulhnu Seminar buatsaih a ni leh Paper tha taktak buatsaihtu an awm chu  a sawi a. Mizote hi hun hlui vawn thatah kan chak lova, Record vawn rhat te hi harsa kan ti a, hei hian History kan ziahnaah te harsatna a thlen a ni a ti a. Vawiin Seminar a pipu te sulhnu Record tha tak tak a awm chu tha a tih thu leh Paper leh Article buatsaih te chu a dang te nen khawn khawm a, vawn that tha a tih thu a sawi a. Heng hi hnam ropui ni tur te, hnam anga ding chhuak turin leh kan tu leh fate tan pawh a pawimawh em em a ni a ti. Khuallian chuan Pipute Sulhnu te chu chei bawl leh tidanglam lova a awm ang anga vawn that chu tul a tih thu sawiin thangthar lo awm zel turte pawhin an hlut zawk a ring tih a sawi a ni.

 

Seminar khuh hawnnaah hian khualzahawm, Additional DC leh DRDA Project Director ni bawk Pu Lalrohlua pawhin thu sawiin Pipute sulhnu awm ang ang te chu a awmna khaw mipuiten neitu rilru pu chunga enkawl tul a tih thu a sawi ve bawk a. Khualzahawm thu sawi zawh hian Seminar Organizing Committee leh Mizo Historical Village Chawngtlai atangte in Report ngaihthlak a ni.

 

Khuh hawnna neih zawh hian Seminar neih chhunzawm nghal niin hetah hian mi 11 in Khawzawl District huamchhunga Pipute Sulhnu awm hrang hrang zinga Subject thlan bik neia Paper an buatsaih te chu zirho a ni a, Paper buatsaihtute zingah hian Khawzawl District pawnlam atanga rawn tel mi pakhat a awm a ni.

 

Vawiin Seminar-ah hian MHVC Member te, Chawngtlai VC te leh NGO hruaitute bakah Khawzawl MJA Member te leh Govt. Khawzawl College a Mizo Subject zirlai 4 an tel a ni.

Chawngtlai khua hi kum 2014 February ni 21 khan Mizo Historical Village-ah puan a ni a, Chawngtlai hi Mizoram a thingtlang khuaa Thlanmual nei hmasa ber an nih bakah Mizoram a lungphun sang ber awmna a ni a. Heng bakah hian Lal Nikuala In hmun, Sahlam, Pasaltha Hranghleia Thlan, Lung milem, kum 1700 hmalama Hmarho Lungtat,  Lalsi Lalnu Tantinchhingi Khawpui Tan tlang leh Lal Nikhuala in thawina hmun, Lalruanga Lung kah kek, Khawpui Tan Puk, Lal lungdawh bakah Pipute sulhnu hrang hrang te humhalhin hmuh tur ala awm a ni.