Khawzawl 21st. May, 2022 : Khawzawl Wildlife Division, Environment, Forests & Climate Change Department leh Khawzawl Sub-Hqrs. YMA te tangkawp bultumin vawiin chawhma dar 11:00 khan Khawzawl Electric YMA Hall-ah International Day for Biological Diversity, 2022 pualin YMA hruaitute tan leilung leh nungcha te humhalh a pawimawhzia inhrilhhriatna buatsaih a ni a, he hun hi Khawzawl District Bawrhsap Pu C.C. Lalchhuangkima chuan khuallian niin a hmanpui a ni.

District Bawrhsap Pu C.C. Lalchhuangkima chuan kumtin May ni 22 hi International Day for Biological Diversity hman thin a nih thu leh kuminah hian thupuiah 'Building a shared future for all life' tih hman a ni a ti a. Nungcha tinrengte hian khawvel hi kan chenna hmun atan kan intawm a ni a, chuvangin tumah intichhe tur kan awm lova, dimdawi taka inenkawl tlang a, chengho tur kan ni a, chumi tur chuan kan zavai hian tan kan lak a ngai a, kan beih tlan a ngai a ni a ti a. Vawiina YMA Branch hrang hrang te nen hemi chungchang zirhona hun buatsaih a ni hi Khawzawl District tan vanneihthlak a tih thu a sawi bawk.

Vawiin Programme hi Session 2 a buatsaih a ni a, First Session hi Pu C. Lalhmingliana, Vice-President, SYMA in kaihruaiin D.C. in thu a sawi bakah K. Lalnunsanga, President, SYMA in thu a sawi a. Pu Samson Thanruma, DFO, Wildlife Division in 'Wildlife Protection Act 1972' chungchanga hriat tur pawimawh te Power Point Presentation hmangin YMA hruaitu kalkhawmte hrilhhriatna a nei a ni. Second Session chu Pu Kamdingliana, Chairman, Science & Environment Sub-Committee, SYMA kaihhruaia neih niin Khawzawl S.P. Pu PC. Lalchunglura'n thu a sawi bakah Pu Rongura Hrahsel, MFS (Rtd) in 'Issues and problems of Wildlife Conservation in Mizoram and role of NGO in conservation' tih thupui hmangin thu a sawi bawk.

Vawiin hun hmanah hian Khawzawl khawpui chhunga YMA Branch hrang hrang atangin YMA hruaitute an tel a ni.