Khawzawl, the 4th February, 2022:
Vawiin chhun dar 12:00 khan KVK Training Hall, Khawzawlah ICAR-Indian Institute of Horticultural Research, Bengaluru atanga Best Farmer Award dawng tu Pu F. Lalsangzuala, Tualte chu citation hlan a ni a. Citation hi DC aiawhin Pu Lalrohlua, Additional Deputy Commissioner, Khawzawl District chuan a hlan a ni.
Hemi puala hun hman, Dr. Henry Saplalrinliana, Sr. Scientist & Head, Khawzawl KVK kaihhruaiah Additional DC chuan thu sawiin, Best Farmer Award dawngtu Pu F Lalsangzuala chu a lawmpui takzet tih a sawi a. Tualte khawtlangin tomato an hlawhtlinpuina chu a kalkawng a thuiin, hlawhtling tlaka an beih dan chu a ngaihnawmin a ropui hle a ni, a ti a, hmasawn zel turin duhsakna a hlan bawk. Tualteah bakah hian Mizorama langsar thamin Kawlkulhah dragonfruit leh Sialhawkah lakhuihthei kalpui mek a ni a, Rabungah pawh uar zawka balhla chin kalpui tan a ni bawk tih a sawi a. District Bawrhsap pawhin Khawzawl District chu "Horticulture District of Mizoram" hming vuah hial tlak ni a a hriat thu Additional DC chuan a tarlang a ni.
Dr. Malsawmkimi, SMS (Horti), KVK Khawzawl pawhin thu sawiin, kum 2018 atangin KVK Khawzawlin Tualte-a tomato chin chu a bul a tanpui a, tomato variety natna do thei hrang hrang hlawhtling takin an enchhin tawh tih a tarlang a. Tualte khawtlang theihna hria a Horticulture Department in zau zawka hma a la chhunzawm chu lawmawm a tih thu a sawi bawk.
Pu F. Lalsangzuala hi ICAR-Indian Institute of Horticultural Research, Bengaluru chuan nikum khan Best Farmer Award dawng turin a thlang a. Award hlanna pawh hi September, 2021 ah Virtual a neih tawh niin, Covid-19 hrileng vangin award semna hmun Bengaluru ah a kal thei lo a. Citation hi KVK Khawzawlah rawn thawn niin vawiinah hlan a ni ta a ni.
Best Farmer Award dawngtu hi Tualte atangin Pu Lalzemawia, Village Council President leh VC member dangten an tawiawm a ni.
Written by H. Lalramenga, SDC, Khawzawl District
