Khawzawl, the 22^nd November, 2021:

Vawiin khan Pu C.C. Lalchhuangkima, Deputy Commissioner, Khawzawl District leh Pu Lalrohlua, Additional DC te chuan motor accident vanga Aiduzawl khaw mi paruk boral leh hliam tuar mi sawmpakhatte chu Rabungah kalin a tlawh a, ralna leh kanna pawisa fai a hlan. 

Tukin dar 9:35 vel khan Aiduzawl atanga Rabunga mitthi vui tura kal motor (pikup) chu kawnglakah accident in, he chhiatnaah hian vanduaithlak takin mi parukin nunna an chan a, hliam tuar mi sawmpakhat an awm bawk. Mitthi leh hliam tuarte hi Rabungah lak phei nghal an ni a, hliam tuar zinga mi pariatte chu Aizawlah refer an ni. 

Chhiat tawh thu hriat a nih hian Khawzawl District Bawrhsap Pu C.C. Lalchhuangkima leh Additional DC te chuan Khawzawl atangin Rabung an pan nghal a. Rabung Primary Health Centre a hliam tuar awmte tlawhin Rs. 1,000 (cheng sangkhat) theuhin an kan a. Rabung YMA Hall-a accident vanga boralte an dahna pawh tlawhin, mitthi chhungte hnenah ruang tuamna puan leh ralna pawisa Rs. 3,000 (cheng sangthum) theuh an hlan bawk. Hemi bakah hian Rabung leh Aiduzawl VC te hnenah a tulna apianga hman turin Rs. 5,000 (cheng sangnga) leh silpaulin panga ve ve hlan a ni bawk a ni. 

Khawzawl DC chuan chhiat tawkte a tawrhpui thu sawiin, a tulna apiangah theihtawp chhuah a inhuam thu a sawi a. Aizawla refer te phurh thlak dan tur chungchangah Rabung leh Aiduzawl VC te nen ruahmanna an siamho nghal bawk a ni. 

Bawrhsap hi leh Additional DC te hi Khawzawl atangin Pu H. Lalramenga, Sub-Deputy Commissioner leh DC office a thawk thenkhatten an tawiawm a ni.

Written by H. Lalramenga, SDC, Khawzawl District