Khawzawl, the 24th October, 2021
Vawiin chawhnu khan Pu C.C. Lalchhuangkima, Deputy Commissioner, Khawzawl District chuan District Hospital, Khawzawl-a Oxygen siamna khawl Pressure Swing Adsorption Plant (Oxygen Plant) chu a hmunah kalin a hnathawh dante a enfiah a, Khawzawl District chhunga damlo, oxygen mamawh tak takten hmundang pan ngai lova Khawzawl ngeia an mamawh an hmu thei tawh tur chu lawmawm a tih thu a sawi.
Prime Minister's Citizen Assistance and Relief in Emergency Situations (PM CARES) Fund kaltlanga District Hospital, Khawzawl-a Oxygen Plant bun hi minute khata Oxygen litre 250 siamchhuak thei niin, October ni 7 khan hawn a lo ni tawh a. A khawl lamah harsatna a awm zui avangin DC Office leh District Hospital a thawktuten hma la nghalin, a khawl siamtu company ISGEC technician ten theihtawp chhuahin siamthat hna an thawk zui nghal a ni. Mihring tana oxygen hipluh tur thianghlim zawng (purity) hi 90% leh a chunglam chu tha tawka ngaih a ni a. District Bawrhsap in a tlawh lai a PSA Plant in Oxygen a pekchhuah thianghlim zawng hi 92% vel a ni. Electric voltage mumal dan azirin PSA Plant hian oxygen purity 96% thleng a siamchhuak thei tih company technician te chuan DC hi an lo hrilh bawk.
Oxygen siamchhuahna khawl hnathawh dan kalphung hi ISGEC Company-a technician ten Khawzawl District Hospital-a thawkte hnenah zirtirna an pe tawh a. Tun dinhmunah PSA Plant leh damdawiina khumte pipe hmanga thlunzawmna (MGPS) hnathawh zawh loh tlem la awmin, hei pawh hi rei lo tea zawhfel theih tawh beisei a ni.
Bawrhsap hi Pu H. Lalramenga, SDC, Dr. Lalnunpuii Renthlei, Medical Officer (Ayush) leh Dr. BK Das, Assistant Manager, ISGEC company leh chanchinbumi ten an tawiawm a ni.
Written by H. Lalramenga, SDC/Media Officer
