Khawzawl 28th April, 2022: India ramin zalenna a hmuh champhaphak vawi 75-na lo thleng tur lawmna kalpui lai mek, ‘Azadi Ka Amrit Mahotsav’ hnuaiah vawiin khan Khawzawl Electric Branch YMA Hall-ah Flowers Show leh High School zirlaite tan Quiz Competition buatsaih a ni. Vawiin chawhma dar 11:00 khan Flowers Show leh High School Quiz Competition-te hi khuallian, Khawzawl District Bawrhsap Pu C.C. Lalchhuangkima chuan a hawng a ni. 

Khuallian Khawzawl District Bawrhsap Pu C.C. Lalchhuangkima chuan thu sawiin, kumin August ni 15 a India ramin zalenna a hmuh champha vawi 75-na lo thleng tur hriatrengnan 'Azadi Ka Amrit Mahotsva' hnuaiah hmalakna hrang hrang kalpui a nih thu leh vawiina programme neih te pawh hemi hnuaia buatsaih hi a ni, a ti a. Hun chep tak karah High School Quiz Competition-a Khawzawl khawpui chhunga High School hrang hrangte an tel thei chu lawmawm a tih thu a sawi a.  Zirlai naupangte chu India rama kan awm hi kan vannei tih hre reng tura chahin, India ram chu khawvel ram ropui leh inawp dan nei tha, ram danpui constitution nei thate zingah a tel a, hei hian mihring nun khawsakhona leh nunphungah te awmzia thui tak a nei a, inawp dan a felfai a, ram nuam a siam thin a ni, a ti.

Flowers Show leh High School Quiz Competition hawnna inkhawm hi Addl. D.C. Pu Lalvenhima chuan a kaihruai a. Hun hman zawhah Flowers Show inelna huanga ti thate hnenah Addl. D.C. Pu Lalvenhima chuan lawmman a hlan a. Flowers Show-ah hian Category 10 awmin pakhatna atanga pathumnate hnenah lawmman pawisafai leh Certificate hlan an ni. Hemi hnu hian High School Quiz Competition  neih chhunzawm niin pakhatna Model High School niin, Rs.9000/- leh thuziak cheimawi an dawng a, pahnihna chu Presbyterian English School, Khawzawl niin Rs.6000/- leh thuziak cheimawi an dawng a. Quiz Competition-ah hian Khawzawl khawpui chhunga High School 6 te telin, pakhatna leh pahnihna bakah hian a tel zawng zawngte hnenah Consolation Prize Rs.1,000/- theuh hlan an ni.

Flowers Show hi Khawzawl DC Office leh Khawzawl Florists Association tangkawp bultuma neih niin High School Quiz Competition hi Khawzawl DC Office leh Khawzawl District Education Office bultuma neih a ni.