Khawzawl, 21st February 2024: Vawiin khan Adviser to Chief Minister (Implementation of Hand-Holding Policy) Pu KC Lalmalsawmzauva chuan Khawzawl a tlawh a. Khawzawl DC Meeting Hall-ah sawrkar Department hotute nen District chhunga sawrkar bungrua/ hmunhma hman tangkai loha awm mek te (Non-Functioning Assets) chungchang an sawi ho a ni.

He hunah hian Pu KC Lalmalsawmzauva chuan ‘Kalphung thar – Mipui Sawrkar’ siam an tumna kawngah sawrkar hnathawkte tawiawmna leh phur puina an dawng tha hle ni a an hriat thu sawiin, kalkhawmte chu lawmthu a hrilh a. Mizoram sawrkar chuan Hand-Holding Policy chu thuang hniha kalpui a tum mek a ni tih sawiin, a thawhkhatnaah sawrkarin a tarlan thlai chi li chingtute ‘ban a kaih’ hmasak tum an ni a, hei hian kum 2-3 hnuah chuan tharchhuah chuangliam (excess production) thlenin Mizoram chu ‘market economy’ (mamawh leh tharchhuahin a kaihhruai/ demand-supply driven economy) ah a hlankai beisei a ni, a ti. Mizoramin tharchhuah chuangliam a neiha ‘market economy’ a a luh theih chuan thalai lehkhathiam ten thlai thar sawngbawlna (processing, packaging etc) an kalpui ang a, Hand-Holding Policy thawhhnihnaah chuan heng ‘1st Generation Enterpreneur’ te hi an ‘ban ah kaih’ a ni dawn a ni, a ti bawk.

Adviser to CM hian Sawrkar Department te inkarah innghirhona awm lo se, Mizoram hmasawnna dah hmasa chungin hna thawk tlang se a duh thu a sawi a. Mizoram sawrkar chuan Mizo te chu a huhova che thin ‘Communitarian Society’ an nihna ang leh khawvel kal zela ‘Capitalist Society’ ziarang an kai tawhna behchhanin mipuite ‘ban a kaih’ a tum mek a ni, a ti a. Sawrkarin he policy a kalpuina kawngah hian khawl thar bun ai chuan a awm sa tih changtlun belh emaw hman tangkai leh zual dan zawn tha a a hriat thu te, sawrkarin thlai leina rate a siam chhan chu kuthnathawktu ten tanchhan tha ‘bargaining power’ an neih theih nan a nih thu a sawi bawk a ni.

Meeting-ah hian Khawzawl District chhunga Department hrang hrang te hmunhma leh khawl hman rih loh emaw hman tangkai tawk loh te dinhmun thlir ho a ni a. Adviser to CM Pu KC Lalmalsawmzauva ho hian heng ‘Non-Functioning Assets’ te hi tangkai leh mumal zawka hman an nih theih dan tur te sawi ho a ni a, inkawmna hun hlawkthlak tak hman a ni.

Vawiin thutkhawm hi Khawzawl DC Pu K. Lalrohlua chuan a kaihruai a, Khawzawl District-a Department hotute an tel kim hle a ni.