Khawzawl, the 15th October, 2020:
Khawzawl District Deputy Commissioner leh District Magistrate Pu Zothanmawia MCS thupek bawhzuiin Covid-19 chungchanga sawrkar thuchhuah hrang hrangte zawm a ni em tih Khawzawl chhunga veng hrang hrangah Zonal Officer, VLTF leh Police ten a hnuaia mi ang hian sawilawk lovin an endik.

12.10.2020: Hermon, Electric, Darngawn leh Arro
13.10.2020: Dinthar, Kawnzar, Zuchhip leh Zaingen
14.10.2020: Vengthar leh Lungvar

Hetianga sawilawk lo a endiknaah hian dawr leh sumdawnna hmundanga Register vawn te, public transport khalhtute, Restaurant leh thingpui dawr, inchhung leh pawna infiamna hmun bakah mipui vantlangin mask vuah, hand sanitizer hman leh social distancing vawn te an zawm tha em tihte endik a ni. 

Endikna atanga a lan danin a tlangpuiin mipuiin sawrkar thuchhuahte an zawm tha a. Chutihrualin dawrkai leh sumdawng thenkhat, register a phone number leh address dah mumal lo an awm a, sawrkar thuchhuak zawm lo mi thenkhatte chu dan anga pawisa chawitir an ni.

Endikna thawhkhatna hi September ni 16 – 18 chhungin neih a lo ni tawh a. A khat tawkin neih chhunzawm a ni ang. 

Covid-19 hripui leng mek hi a darh zel lohna tura fimkhur zui zel turin District Level Task Force on Covid-19, Khawzawl District chuan mipuite a chah a ni.


Written by H. Lalramenga, SDC, Khawzawl District